నందమూరి తారకరామారావు స్వర్గం నుండి ‘లక్ష్మీస్ ఎన్టీఆర్’ ట్రైలర్‌ను దీవించారు. అందుకే చిత్ర ట్రైలర్ అనూహ్యంగా కోటీ వ్యూస్‌ని కొల్లగొట్టింది’ అంటూ ట్వీట్ చేశారు వివాదాస్పద దర్శకుడు రామ్ గోపాల్. ఎన్టీఆర్ జీవితంలోకి లక్ష్మీ పార్వతి ఎలా ప్రవేశించింది.. ఎన్టీఆర్‌ని పెళ్లి చేసుకున్న తరువాత ఎలాంటి పరిణామాలు చోటు చేసుకున్నాయి? లాంటి కీలకఘట్టాలతో ‘లక్ష్మీస్ ఎన్టీఆర్’ చిత్రాన్ని రూపొందించారు రామ్ గోపాల్ వర్మ. సినిమాను రూపాయి ఖర్చులేకుండా ప్రమోట్ చేసుకోవడంలో ఆరితేరిన వర్మ.. ఈ చిత్ర ట్రైలర్‌ను సైతం అదే రేంజ్‌లో ప్రమోట్ చేశారు. ప్రేమికులు దినోత్సవం సందర్భంగా ఫిబ్రవరి 14 ఉదయం 9.27 నిమిషాలకు విడుదలైన ఈ ట్రైలర్ సోషల్ మీడియాను షేక్ చేస్తూ విడుదలైన అరగంటలోనే మిలియన్ వ్యూస్‌ని కొల్లగొట్టింది. ఈ ట్రైలర్‌లో పలు వివాదాస్పద విషయాలను ప్రస్తావించడంతో సినీ రాజకీయ వర్గాల్లో హాట్ టాపిక్ అయ్యింది. దీంతో మిలియన్ల వ్యూస్‌ని కొల్లగొడుతూ.. కేవలం రెండు రోజుల్లో కోటి డిజిటల్ వ్యూస్  రాబట్టిందని.. ఎన్టీఆర్ బ్లెస్సింగ్స్ లభించాయి అంటూ ట్వీట్ చేశారు రామ్ గోపాల్ వర్మ. అందుకు సంబంధించిన లెక్కల్ని కూడా ఈ ట్వీట్‌లో పొందుపరిచారు. మొత్తానికి ఈ ట్రైలర్ విడుదలైన గంటలో ఒక మిలియన్ వ్యూస్.. ఒక్క రోజులో 50 లక్షల వ్యూస్.. రెండు రోజుల్లో కోటీ వ్యూస్ రాబట్టడంతో సినిమాపై అంచనాలు పెరిగిపోయాయి.