YUV News Logo
YuvNews
Open in the YuvNews app
OPEN

ఫ్లాష్ న్యూస్

వార్తలు ఆంధ్ర ప్రదేశ్

నాగబాబుకు అంత వీజీ కాదంట

నాగబాబుకు అంత వీజీ కాదంట

యువ్ న్యూస్ పొలిటికల్ బ్యూరో:

మెగా బ్రదర్ నాగబాబు జనసేనలో చేరారు. తమ్ముడి పార్టీ నుంచి నర్సాపురం ఎంపీ అభ్యర్థిగా బరిలో దిగుతున్నారు. ‘బంధుప్రీతి’ విమర్శలొచ్చే అవకాశం ఉండటంతో.. దొడ్డి దారిన కాకుండా.. రాజమార్గంలో ఎన్నికల బరిలో నిలబెడుతున్నామని, ప్రజాతీర్పును గౌరవిస్తామని జనసేన స్పష్టం చేసింది. నర్సాపురం బరిలో నాగబాబు పోటీ చేయబోతున్న నేపథ్యంలో అక్కడ ఆయనకు కలిసొచ్చే అంశాలేంటి? ప్రతికూలతలేంటో చూద్దాం.. నర్సాపురం లోక్ సభ స్థానం బరిలో వైఎస్ఆర్సీపీ నుంచి రఘురామ కృష్ణంరాజు ఉన్నారు. ఈయన ఇటీవలే టీడీపీ నుంచి జగన్ పార్టీలో చేరారు. ఎంపీగా రఘురామ కృష్ణంరాజు అభ్యర్థిత్వాన్ని టీడీపీ ఖరారు చేసే దశలో ఆయన పార్టీ మారి బాబుకు షాకిచ్చారు. దీంతో ఉండి ఎమ్మెల్యే వేటుకూరి వెంకట శివరామరాజు పేరును నర్సాపురం లోక్ సభ స్థానానికి టీడీపీ ఖరారు చేసింది. క్షత్రియ సామాజిక వర్గానికి చెందిన వీరిద్దరితో నాగబాబు తలపడాల్సి వస్తోంది. ఇక్కడి నుంచి ఎక్కువసార్లు క్షత్రియ సామాజిక వర్గానికి చెందిన వారే ఎంపీలుగా ఎన్నికయ్యారు. కాపు సామాజిక వర్గానికి చెందిన కొత్తపల్లి సుబ్బారాయుడు, చేగొండి హరి రామజోగయ్య కూడా నర్సాపురం నుంచి ఎంపీలుగా గెలిచారు. పవన్ పోటీ చేస్తున్న భీమవరం నియోజకవర్గం నర్సాపురం పరిధిలోకి వస్తుండటం నాగబాబుకు కలిసొచ్చే అంశం. భీమవరంలో పవన్‌కు ఎక్కువ ఓట్లు పడితే.. లోక్ సభ స్థానంలో కూడా జనసేన అభ్యర్థికి ఎక్కువ ఓట్లొచ్చే అవకాశం ఉంది. ఇది కలిసొచ్చే అంశం. మరోలా చూస్తే.. పవన్‌కు కేర్‌టేకర్‌గా నాగబాబును నర్సాపురం నుంచి బరిలో దింపారని భావించొచ్చు. పవన్ మిగతా చోట్ల ప్రచారం చేస్తే.. ఆయన సొంత నియోజకవర్గ బాధ్యతలను నాగబాబు భుజాలకు ఎత్తుకునే ఛాన్స్ ఉంది.నర్సాపురం లోక్ సభ పరధిలోని ఆచంట, పాలకొల్లు, నర్సాపురం, భీమవరం, ఉండి, తణుకు, తాడేపల్లిగూడెం అసెంబ్లీ నియోజకవర్గాల్లో కాపుల ప్రాబల్యం ఎక్కువ. ఈ అంశం నాగబాబుకు కలిసొచ్చే అవకాశముంది. వైఎస్ఆర్సీపీ, టీడీపీల నుంచి బరిలో దిగుతున్న ఇద్దరు క్షత్రియులు. ఈ నియోజకవర్గ పరిధిలోని క్షత్రియ సామాజిక వర్గం ఓట్లు వీరి మధ్య చీలిపోయి.. కాపుల ఓట్లు, మెగా ఫ్యాన్స్ ఓట్లు జనసేనకు మళ్లితే నాగబాబుకు విజయావకాశాలు ఉన్నాయి. నాగబాబుకు ప్రతికూలంగా ఉండే అంశం ధనబలం. టీడీపీ, వైఎస్ఆర్సీపీల తరఫున బరిలో దిగుతున్న ఇద్దరూ ఆర్థికంగా బలమైన నేపథ్యం ఉన్నవారు. కోట్లాది రూపాయలు ఖర్చు పెట్టాల్సి వచ్చినా వారు వెనకాడరు. పార్టీ పరంగా వారికి నిధులు అందే అవకాశం ఉంది. వారితో సమానంగా ఖర్చుపెట్టే స్థితిలో నాగబాబు ఉన్నారా? అనేది అనుమానమే? జనసేన పార్టీ నిధుల నుంచి ఇక్కడేమైనా సర్దుబాటు చేయొచ్చు. కానీ అదెంతవరకు సరిపోతుందనే చూడాలి. ప్రస్తుత పరిస్థితుల్లో అభిమానం మాత్రమే ఓట్లు రాలుస్తుందని భావించలేమని రాజకీయ విశ్లేషకులు అభిప్రాయ పడుతున్నారు. 

Related Posts