YUV News Logo
YuvNews
Open in the YuvNews app
OPEN

ఫ్లాష్ న్యూస్

వార్తలు రాజకీయం తెలంగాణ

కేసీఆర్ ఎక్కడ... సోషల్ మీడియాలో వైరల్

కేసీఆర్ ఎక్కడ... సోషల్ మీడియాలో వైరల్

హైద్రాబాద్, జూలై 6, 
తెలంగాణలో కరోనా వైరస్ విజృంభిస్తోంది. రోజు రోజుకూ కేసుల సంఖ్య పెరుగుతోంది. వరుసగా రెండు రోజులుగా 1800కు పైగా కేసులు నమోదయ్యాయి. ప్రగతి భవన్‌లోనూ 30 మంది వరకూ కోవిడ్ బారిన పడినట్లు వార్తలొస్తున్నాయి. ఇక హైదరాబాద్ నగరంలోనైతే కోవిడ్ ప్రభావం తీవ్రంగా ఉంది. నగరంలోని ప్రతి చోటా కేసులు నమోదవుతున్నాయి. దీంతో నగరంలో లాక్‌డౌన్ విధిస్తారనే ప్రచారం జరుగుతోంది. కరోనా ప్రభావానికి లాక్‌డౌన్ ప్రచారం తోడవడంతో చాలా మంది నగరాన్ని వదిలి సొంతూళ్లకు వెళ్తున్నారు. హెల్త్ బులెటిన్ ప్రకారం రాష్ట్రంలో ఇప్పటి వరకూ 1,10,545 టెస్టులు చేస్తే.. 22,312 పాజిటివ్ కేసులు నమోదయ్యాయి. మిగతా రాష్ట్రాలతో పోలిస్తే తెలంగాణలోనే పాజిటివ్ రేటు ఎక్కువగా ఉండగా.. టెస్టులు మాత్రం తక్కువగా ఉంటున్నాయి. ఇంతటి ఇబ్బందికర పరిస్థితుల్లో సీఎం కేసీఆర్ ప్రగతి భవన్‌ను వదిలి వెళ్లి.. ఫామ్ హౌస్‌లో ఉంటున్నారని ప్రచారం జరుగుతోంది.రాష్ట్రంపై కోవిడ్ మహమ్మారి పంజా విసురుతున్న సమయంలో కేసీఆర్ ఎక్కడ అని నెటిజన్లు ప్రశ్నిస్తున్నారు. ట్విట్టర్‌లో #WhereIsKCR అనే హ్యాష్‌ట్యాంగ్ ట్రెండ్ అయ్యింది. హైదరాబాద్ కంటే తక్కువ కేసులు నమోదవుతున్నప్పటికీ బెంగళూరు ప్రతి ఆదివారం లాక్‌‌డౌన్ విధిస్తోన్న విషయాన్ని నెటిజన్లు ప్రస్తావిస్తున్నారు. జనం హైదరాబాద్ వదిలి వెళ్తున్న న్యూస్ క్లిప్పింగులను ట్వీట్ చేసి... కాపాడాల్సిన వాళ్లే కనపడకుండా పోయారు అని వ్యంగాస్త్రాలు సంధిస్తున్నారు.హైదరాబాద్ నుంచి 25 లక్షల మంది వెళ్లారని అంచనా.. మరి కేసీఆర్ ఎక్కడ? అని ఒకరు ప్రశ్నిస్తే.. టీఆర్ఎస్ ప్రభుత్వం హైదరాబాద్‌‌ను దయనీయ స్థితిలోకి నెట్టేస్తోందని ఒకరు కామెంట్ చేశారు.జులై 2న దేశంలో పాజిటివ్ రేట్ 6.68 శాతంగా ఉంటే తెలంగాణలో జూన్ 27 నుంచి జులై 4 తేదీల మధ్య కనిష్టంగా 22.64 శాతం, గరిష్టంగా 36.82 శాతంగా నమోదైందని తెలంగాణ కాంగ్రెస్ ట్వీట్ చేసింది. రాష్ట్రం ఇబ్బందుల్లో ఉన్నప్పుడు కేసీఆర్ ఫామ్‌హౌస్‌కు మకాం మార్చారా? అని ప్రశ్నించింది. ‘‘అన్ని ‘అద్భుతంగా’ చేసినం అన్నడు అందరిని ముంచి సల్లగా ఫామ్ హౌస్‌కు జారుకున్నడు. టిమ్స్‌లో ఇంకా నియామకాలు ఎంతవరకు వచ్చినై మరి చికిత్స ఎప్పుడు అందిస్తరు?’’ కాంగ్రెస్ పార్టీ కేసీఆర్ సర్కారును నిలదీసింది.

Related Posts