అర్జున్ రెడ్డి’ సినిమాతోనే విజయ్ దేవరకొండ పేరు మార్మోగింది. అర్జున్ రెడ్డి పాత్రను అవలీలగా, అద్భుతంగా పోషించిన విజయ్‌కు ఆ సినిమా తర్వాత పక్క భాషల్లో కూడా అవకాశాలు వచ్చాయి. అర్జున్ రెడ్డి సినిమాను తెలుగు వారితో పాటు తమిళులు, కన్నడీగులు కూడా చూసేశారు. ప్రస్తుతం ఆయా భాషల్లో ఆ సినిమా రీమేక్ అవుతోంది కూడా. ఇప్పటికే విజయ్ దేవరకొండ తమిళంలో ఒక సినిమాకు సైన్ చేసేశాడు. నోటా’ పేరుతో తమిళంలో ఒక సినిమా రూపొందుతోంది. అందులో విజయ్ హీరోగా నటిస్తున్నాడు. ఇప్పుడు విశేషం ఏమిటంటే ఈ హీరో తాజా సినిమా ‘గీతగోవిందం’ కూడా పక్క రాష్ట్రాల్లో మంచి వసూళ్లను రాబడుతోంది. తెలుగు రాష్ట్రాలతో పాటు.. తమిళనాడు, కర్ణాటకల్లో కూడా ఈ సినిమాకు మంచి వసూళ్లు లభిస్తుండటం విశేషం. కర్ణాటకలోని తెలుగు మాట్లాడే ప్రాంతాలు, బెంగళూరుల్లో గీతగోవిందం సినిమాకు మంచి వసూళ్లున్నాయని ట్రేడ్ రిపోర్ట్ చెబుతోంది. అర్జున్ రెడ్డి హీరో మరోసారి ఆకట్టుకుంటున్నాడనే ప్రచారంతో ఈ సినిమాకు మంచి వసూళ్లు వస్తున్నాయి. ఇక తమిళనాడులోని చెన్నై, కోయంబత్తూర్ ప్రాంతంలో ‘గీతగోవిందం’ సినిమాకు మంచి వసూళ్లు ఉండటం గమనార్హం. ఈ విధంగా పక్క రాష్ట్రాల్లో కూడా విజయ్ ‌కి మంచి మార్కెట్ కనిపిస్తోంది. ఇది జ్ఞాన‌వేల్ రాజాకు ఆనందాన్ని ఇచ్చే విషయమే. ఎందుకంటే.. విజయ్ దేవరకొండతో ‘నోటా’ సినిమాను రూపొందిస్తున్నది ఆ నిర్మాతే. విజయ్ వరస విజయాలతో ఉండటం ‘నోటా’ సినిమాకు ప్లస్ పాయింట్ అయ్యే అవకాశం ఉంది.