రేవంత్‌రెడ్డి అక్రమాల చిట్టాను దర్యాప్తు సంస్థలు బయటపెట్టాలంటున్నారు టీఆర్ఎస్ ఎంపీ బాల్క సుమన్. రేవంత్ ఇంట్లో ఐటీ సోదాలు జరిగితే.. టీఆర్ఎస్‌కు ఏం సంబంధమని ప్రశ్నించారు. శుక్రవారం తెలంగాణ భవన్‌లో మాట్లాడిన సుమన్.. రేవంత్ ఇంట్లో సోదాలు, కాంగ్రెస్ నేతల విమర్శలపై స్పందించారు. కాంగ్రెస్ తీరు దొంగే దొంగ అన్నట్లుగా ఉందని సెటైర్ వేశారు సుమన్. ఐటీశాఖ రాష్ట్ర ప్రభుత్వ పరిధిలో ఉండదన్న విషయాన్ని ఆ పార్టీ నేతలు గ్రహిస్తే మంచిదన్నారు. ప్రజల్లో సానుభూతి కోసం.. టీఆర్ఎస్‌పై విమర్శలు చేస్తున్నారని మండిపడ్డారు. 40 ఏళ్లుగా రాజకీయాల్లో ఉన్న జానారెడ్డి, జైపాల్‌రెడ్డి ఇళ్లల్లో ఐటీ సోదాలు ఎందుకు జరగడం లేదని ప్రశ్నించారు సుమన్. వందల, వేల కోట్ల ఆస్తులు రేవంత్‌రెడ్డికి ఎలా వచ్చాయో చెప్పాలన్నారు. దావూద్ ఇబ్రహీం, చోటాషకీల్‌కు ఏమాత్రం తగ్గని వ్యక్తని.. ఆదాయం పన్ను కట్టకుండా దేశాన్ని మోసం చేసిన వ్యక్తని విమర్శించారు. తెలంగాణ తులసి వనంలో రేవంత్‌ ఓ గంజాయి మొక్కంటూ మండిపడ్డారు. రేవంత్ ఎన్నికల్లో పోటీ చేయకుండా అనర్హుడిగా ప్రకటించాలన్నారు. త్వరలో ఈసీని కూడా కలిసి ఫిర్యాదు చేస్తామన్నారు. ఓటుకు నోటు కేసులో దొరికిన 50 లక్షలపై ఆరా తీస్తే రేవంత్ డొంక మొత్తం కదిలిందన్నారు సుమన్. బంధువులు, బినామీల పేరుమీద కోట్ల ఆస్తులు కూడబెట్టారని.. ఈ అక్రమాలన్నింటినీ దర్యాప్తు సంస్థలు బయటపెట్టాలన్నారు. తెలంగాణ కాంగ్రెస్ పార్టీ దొంగల ముఠా.. నోట్లు పంచడం, చిల్లర రాజకీయాలు చేయడం కాంగ్రెస్ బాగా అలవాటన్నారు. అడ్డంగా దొరికిన రేవంత్‌రెడ్డికి కాంగ్రెస్ నేతలు వంతపాడటం విడ్డూరంగా ఉందన్నారు. హవాలా మార్గంలో డబ్బులు సంపాదించిన రేవంత్‌ను ఉత్తమ్ ఎలా సమర్ధిస్తున్నారో చెప్పాలన్నారు. ఈ అక్రమ సంపాదనపై కాంగ్రెస్ నేతలు జవాబు చెప్పాలని డిమాండ్ చేశారు సుమన్.