విజయ్ దేవరకొండ ఒక మల్టీస్టారర్ ప్రాజెక్టుకు ఓకే చెబుతున్నాడా? ఇందుకు సంబంధించిన ప్రతిపాదనలు వచ్చాయా? తమిళ క్రేజీ హీరో సూర్యతో కలిసి విజయ్ దేవరకొండ ఒక సినిమాకు గ్రీన్ సిగ్నల్ ఇస్తున్నాడా? అంటే ఔననే అంటున్నాయి తమిళ మీడియా వర్గాలు. ప్రస్తుతం ‘నోటా’ ప్రచారంలో భాగంగా తమిళ మీడియాతో మాట్లాడుతున్న విజయ్.. మల్టీస్టారర్ ప్రతిపాదన ఉందని చెప్పాడు. ఒక దర్శకుడు ఈ ప్రతిపాదనను తీసుకొచ్చినట్టుగా వివరించాడు. సూర్య, తన కాంబోలో సినిమాను తెరకెక్కించాలని దర్శకుడి వద్ద ఐడియా ఉందని. .ఇంకా ఏమీ ఖరారు కాలేదని విజయ్ వివరించాడు. ప్రస్తుతానికి ఏదీ అధికారికం కాదని, కేవలం ప్రతిపాదన మాత్రమేనని విజయ్ స్పష్టం చేశాడు. ఈ ఐడియా కార్యరూపం దాల్చవచ్చు, దాల్చకపోవచ్చు అని విజయ్ వ్యాఖ్యానించాడు. ఒకవేళ విజయ్ దేవరకొండ సూర్యతో కలిసి నటిస్తే అదొక క్రేజీ ప్రాజెక్టే అవుతుంది. యంగ్ జనరేషన్ లో మంచి క్రేజ్ ఉన్న విజయ్, తమిళ, తెలుగు భాషల ప్రేక్షకుల్లో మంచి గుర్తింపు ఉన్న సూర్యలు కలిసి నటిస్తే.. అదొక క్రేజీ మల్టీస్టారర్ అవుతుంది. మరి ఈ ప్రాజెక్టు ఏమేరకు పట్టాలెక్కుతుందో చూడాల్సి ఉంది. అదలా ఉంటే వచ్చే నెల ఐదో తేదీన విజయ్ దేవరకొండ ‘నోటా’ విడుదల కానుంది.