వైఎస్సార్ కాంగ్రెస్ పార్టీలో మరో నియోజకవర్గంలో టికెట్ పోరు మొదలైంది. పాత ఇన్ చార్జికి, కొత్త ఇన్ చార్జికి మధ్యన టికెట్ వార్ షురూ అయ్యింది. ఈ మధ్య కాలంలోనే నియోజకవర్గాల సమన్వయకర్తల మార్పులతో కొన్ని నియోజకవర్గాలో ఇలాంటి రచ్చలు రాజుకోగా.. ఇప్పుడు ఈ జాబితాలో చేరింది గుంటూరు పశ్చిమ నియోజకవర్గం. ఇక్కడ వైఎస్సార్ కాంగ్రెస్ పార్టీ ఇన్ చార్జిగా ఏసురత్నంను నియమించారు ఆ పార్టీ అధినేత వైఎస్ జగన్ మోహన్ రెడ్డి. ఇటీవలే ఏసురత్నం వైకాపాలో చేరారు. ఈ నేపథ్యంలో ఆయనను గుంటూరు వెస్ట్ నుంచి అభ్యర్థిగా ప్రకటించారు. అయితే ఈ ప్రకటన ఇప్పటి వరకూ ఆ నియోజకవర్గం ఇన్ చార్జిగా ఉండిన లేళ్ల అప్పిరెడ్డికి ఇబ్బందికరంగా మారింది. గత ఎన్నికల్లో ఈ నియోజకవర్గం నుంచి ఎమ్మెల్యేగా పోటీ చేశారు అప్పిరెడ్డి. అయితే టీడీపీ అభ్యర్థి మోదుగుల వేణుగోపాల్ రెడ్డి చేతిలో అప్పిరెడ్డి చిత్తయ్యారు. మోదుగులకు భారీ మెజారిటీ దక్కింది. ఎన్నికల అనంతరం కూడా లేళ్ల ఈ నియోజకవర్గం ఇన్ చార్జిగా కొనసాగారు. అయితే ఇప్పుడు జగన్ మార్పు చేశారు. ఈ నేపథ్యంలో లేళ్ల తన అనుచరగణంతో తన ఆఫీసులో సమావేశం అయ్యారు. ఈ సమావేశంలో ఆయన అనుచరగణం మాట్లాడుతూ.. ప్రాధాన్యత దక్కని చోట ఉండవద్దని, రాజీనామా చేయాలని కోరారట. అయితే లేళ్ల మాత్రం ఎలాంటి నిర్ణయాన్ని ప్రకటించలేదు. ప్రస్తుతం ఆయన అధినేత జగన్ మోహన్ రెడ్డితో సంప్రదింపులు జరిపే ప్రయత్నం చేస్తున్నాడని సమాచారం.