తెలంగాణ రాష్ట్ర ఆపద్ధర్మ మంత్రి తన్నేరు హరీష్‌రావు ఆస్తులు ఈ నాలుగేళ్లలో 6.5 రెట్లు పెరిగాయి. 2014లో రూ.45 లక్షలుగా ఉన్న హరీష్ స్థిరాస్తి విలువ.. 2018 నాటికి రూ.3.46 కోట్లకు పెరిగింది. అలాగే 2014లో రూ.90 లక్షలుగా ఉన్న చరాస్తి విలువ రూ.1కోటికి పెరిగింది. బుధవారం సిద్ధిపేట అసెంబ్లీ నియోజకవర్గం నుంచి హరీష్‌రావు వేసిన నామినేషన్ పత్రాలు ఈ విషయాన్ని తెలియజేస్తున్నాయి. ఎన్నికల అధికారికి హరీష్‌రావు సమర్పించిన మొత్తం 19 పేజీల అఫిడవిట్‌లో తన ఆస్తుల వివరాలను పొందుపరిచారు. తన చరాస్తుల విలువ కోటి రూపాయలని, స్థిరాస్తులు విలువ రూ.3.46 కోట్లని అఫిడవిట్‌లో హరీష్ పేర్కొన్నారు. తన మొత్తం ఆస్తుల విలువ రూ.3.90 కోట్లుగా వెల్లడించారు. తనకు తాను రైతుగా చెప్పుకున్న హరీష్.. వ్యవసాయం ద్వారా రూ.1.26 లక్షలు వచ్చిందని తెలిపారు. వ్యవసాయేతర భూమిపైనే తాను ఎక్కువగా పెట్టుబడులు పెట్టానని, దీని ద్వారా రూ.3 కోట్లు అర్జించానని వెల్లడించారు. అలాగే బ్యాంకులకు రూ.25 లక్షల అప్పులు చెల్లించాల్సి ఉందన్నారు. 2017-18 ఆర్థిక సంవత్సరంలో తాను రూ.19.13 లక్షల ఆదాయ పన్ను చెల్లించానని స్పష్టం చేశారు. కాకతీయ యూనివర్సిటీ నుంచి బ్యాచిలర్ ఆఫ్ ఆర్ట్స్ డిగ్రీ పొందిన హరీష్‌రావుపై మూడు క్రిమినల్ కేసులు ఉన్నాయి. అయితే ఈ కేసుల్లో తాను దోషిగా తేలలేదని హరీష్ అఫిడవిట్‌లో పేర్కొన్నారు.