ప్రాధాన్యత ఉన్న పాత్రలను మాత్రమే ఎంపిక చేసుకునే హీరోయిన్లలో అనుష్క ముందు వరుసలో ఉంటారు. కెరీర్ తొలినాళ్లలో గ్లామరస్ పాత్రలు చేసిన అనుష్క.. ‘అరుంధతి’ సినిమాతో తనలోని రెండో కోణాన్ని ప్రేక్షకులకు పరిచయం చేశారు. ఇక ‘బాహుబలి’ సినిమాతో దేశవ్యాప్తంగా అభిమానుల్ని సంపాదించుకున్నారు. కిందటేడాది ‘భాగమతి’ సినిమాతో భయపెట్టిన అనుష్క.. ఇప్పుడు ‘సైలెన్స్’గా ప్రేక్షకుల ముందుకు రావడానికి సిద్ధమవుతున్నారు. ఒక సినిమా సెట్స్‌పై ఉండగానే మరో బహుభాషా చిత్రాన్ని అనుష్క అంగీకరించారు. శబరిమల అయ్యప్ప స్వామిపై నిర్మించనున్న ఈ చిత్రంలో అనుష్క ప్రధాన పాత్రలో కనిపించనున్నారు. తెలుగు, తమిళం, మలయాళంతో పాటు హిందీలో తెరకెక్కించనున్న ఈ చిత్రానికి సంతోష్ శివన్ దర్శకత్వం వహించనున్నారు. శ్రీ గోకులం ఫిల్మ్స్ బ్యానర్‌పై గోకులం గోపాలన్ నిర్మిస్తున్నారు. ప్రీ ప్రొడక్షన్ దశలో ఉన్న ఈ చిత్రానికి ప్రశాంత్ స్క్రిప్ట్ సిద్ధం చేస్తున్నారు. ఈ ఏడాది ఆగస్టులో ఈ సినిమా సెట్స్‌పైకి వెళ్లనుందని చెన్నై సినిమా వర్గాల ద్వారా తెలుస్తోంది. ఇంకో విశేషమేమిటంటే ఈ సినిమాకు మ్యూజిక్ లెజెండ్ ఏఆర్ రెహమాన్ సంగీత సమకూర్చనున్నారని అంటున్నారు. సంతోష్ శివన్ ఓవైపు సినిమాటోగ్రాఫర్‌గా పనిచేస్తూనే దర్శకత్వం కూడా వహిస్తున్నారు. అలాగే మలయాళంలో వరసపెట్టి సినిమాలను నిర్మిస్తున్నారు. మణిరత్నం సినిమాలతో సంతోష్ శివన్ సుపరిచితుడు. ఆయన సినిమాలన్నింటికీ దాదాపుగా ఈయనే సినిమాటోగ్రాఫర్. మురుగుదాస్ దర్శకత్వంలో వచ్చిన ‘స్పైడర్’ సినిమా ద్వారా సంతోష్ శివన్ తెలుగు సినీ పరిశ్రమకూ పరిచయమయ్యారు. ప్రస్తుతం మలయాళంలో ‘జాక్ అండ్ జిల్’ అనే సినిమాకు దర్శకత్వం వహిస్తున్నారు. అది పూర్తయిన వెంటనే అనుష్కతో సినిమాను పట్టాలెక్కిస్తారు.ఇంతవరకు బాగానే ఉన్నా.. అయ్యప్పపై సినిమా కాబట్టి ఇది వివాదాలకు దారి తీస్తుందేమో అనే అనుమానాలు కలుగుతున్నాయి. అయ్యప్ప ఆలయంలోకి మహిళ ప్రవేశం విషయం ఎంత వివాదాస్పదమైందో అందరికీ తెలిసిందే. అలాంటిది ఇప్పుడు మహిళ ప్రధాన పాత్రగా అయ్యప్ప సినిమా వస్తుందంటే ఇదెన్ని వివాదాలకు దారితీస్తుందో అని చాలా మంది అనుకుంటున్నారు.