మెగా ప్రిన్సెస్ అనే బలమైన ఐడెండిటీతో టాలీవుడ్‌లో ఎంట్రీ ఇచ్చిన మెగా డాటర్ నిహారిక సక్సెస్ కోసం రాజీలేని పోరాటం చేస్తుంది. ‘ఒక మనసు’, ‘హ్యాపీ వెడ్డింగ్’ రెండు చిత్రాలు పరాజయం పాలు కావడంతో.. ‘సూర్యకాంతం’ అవతారం ఎత్తింది. నిహారికతో రెండు వెబ్ సిరీస్‌లు రూపొందించిన ప్రవీణ్ బ్రహ్మాండపల్లి డైరక్షన్‌లో నిహారిక చేసిన సూర్యకాంతం శుక్రవారం నాడు విడుదలైంది. అయితే ఈ మూవీ కూడా నిహారికను మెగా ప్రిన్సెస్‌గా నిలబెట్టలేకపోయింది. రొటీన్ కథను సాగదీసి సినిమా చూపించడంతో సూర్యకాంతాన్ని తట్టుకోవడం కష్టమే అంటూ ప్రేక్షకులు పెదవి విరుస్తున్నారు. ఇక సూర్యకాంతం సినిమా రిజల్ట్ సంగతి పక్కన పెట్టేస్తే.. ఈ మూవీ ప్రమోషన్స్‌లో భాగంగా నిహారిక సినీ విశేషాలతో పాటు పర్సనల్ అండ్ సోషల్ ఇష్యూపై స్పందించింది. నిహారిక మాట్లాడుతూ.. ‘మహిళలపై అఘాయిత్యాలు జరుగుతున్నాయంటే.. దానికి కారణం వాళ్ల వస్త్రధారణే కారణం అనే వాళ్లను చూస్తే కోపం వస్తుంది. అమ్మాయిలు చీరలు కట్టుకోకుండా పొట్టి డ్రెస్‌లు వేస్తుంటే రేప్‌లు జరుగుతున్నాయంటూ పిచ్చిగా వాదిస్తున్నారు. కళ్లను కంట్రోల్‌ పెట్టుకోలేవాడిని సమర్ధిస్తూ కామెంట్స్ చేస్తున్నారు. పొట్టి డ్రెస్‌లు వేసుకుంటే అమ్మాయిలు తప్పు చేసినట్టేనా? అయినా వాళ్లకు నచ్చినట్టు ఉండటంతో తప్పేంటో అర్ధం కావడం లేదు. ఎవరికి నచ్చినట్టు వాళ్లు ఉంటారు. వస్త్రాల విషయంలో కూడా అంతే. అలా ఉండాలి ఇలా ఉండాలి అంటూ అమ్మాయిలకు రూల్స్ పెడుతున్నారు. అంతెందుకు ఇప్పుడు ఎవడైనా వచ్చి నన్ను తాకరాని చోట తాకితే నేను ‘ఏవండీ వెధవ గారు అలా చేయకూడదండీ’ అని అనను కదా. నాకు తెలిసిన అతి పెద్ద బూతు తిడతాను. ఇంకా కోపం వస్తే లాగిపెట్టి ఒకటి కొడతాను. అంతేతప్ప నాకెందుకులే అని వదిలే ప్రసక్తేలేదు. ఎవరి లిమిట్స్‌లో వాళ్లు ఉంటే ఎవరికీ ఇబ్బంది ఉండదు’ అంటూ మెగా వార్నింగ్ ఇస్తోంది నిహారిక కొణిదెల.