యువ్ న్యూస్ ఫిల్మ్ బ్యూరో: 

విడుదలలో వివాదాలు ఎదుర్కొన్నా.. కలెక్షన్ల పరంగా కాసులు కురిపిస్తోంది రామ్ గోపాల్ వర్మ ‘లక్ష్మీస్ ఎన్టీఆర్’. అనేక వాయిదాల అనంతరం మార్చి 29న విడుదలైన ఈ మూవీ ఆంధ్రప్రదేశ్ మినహా.. ప్రపంచ వ్యాప్తంగా విడుదలై తొలిరోజు మంచి ఓపెనింగ్స్ రాబట్టింది. తక్కువ బడ్జెట్‌తో రూపొందించిన ఈ చిత్రం తొలి మూడు రోజుల్లో రూ. 10 కోట్ల గ్రాస్.. రూ. 5. 56 కోట్ల షేర్ వసులు చేసింది. ఇక ఓవర్సీస్‌లో తొలిరోజు 125 స్క్రీన్స్‌పై భారీగా విడుదలైన ఈ మూవీ ప్రీమియర్స్ షో ద్వారా 90, 214 డాలర్లు వసూలు చేసింది. తొలిరోజు నుండి విడుదలైన అన్నిచోట్లా ఆక్యుపెన్సీ ఉండటంతో ‘లక్ష్మీస్ ఎన్టీఆర్’ కలెక్షన్ల వర్షం కురిపిస్తోంది. ఒకవైపు థియేటర్స్‌లో సినిమాలు ఏమీ లేకపోవడంతో వచ్చే శుక్రవారం వరకూ ఈ కలెక్షన్లు కంటిన్యూ అయ్యే అవకాశాలు కనిపిస్తున్నాయి.తాజాగా ఈ మూవీ ఫస్ట్ వీకెండ్ యూఎస్ఏ కలెక్షన్ల వివరాలను తెలియజేశారు ఆర్జీవీ. ఇప్పటికి 2, 43, 720 డాలర్లు వసూలు చేయడంతో 2019లో హయ్యెస్ట్ గ్రాసర్ చిత్రాల్లో లక్ష్మీస్ ఎన్టీఆర్ నాలుగో స్థానంలో ఉన్నట్టు తెలిపారు వర్మ. ఇక వర్మ చిత్రంలో పోటీ పడుతూ శుక్రవారం నాడు విడుదలైన ‘సూర్యకాంతం’ మూవీ కేవలం 26, 144 డాలర్లు వసూలు చేసిందని.. నిహారిక కెరియర్‌లో ఇది మూడో డిజాస్టర్ మూవీ అంటూ ట్వీట్ చేశారు వర్మ. కాగా.. నందమూరి బాలక్రిష్ణ నటించిన ‘ఎన్టీఆర్ మహానాయకుడు’ ఆంధ్ర, తెలంగాణలతో పాటు ఓవర్సీస్‌లోనూ భారీగా విడుదలైనప్పటికీ.. ఫుల్ రన్‌లో కనీసం రూ. 5 కోట్లు కూడా సాధించలేకపోయింది. అయితే ‘లక్ష్మీస్ ఎన్టీఆర్’ కేవలం నాలుగు రోజుల్లోనే రూ. 6 కోట్లకు పైగా వసూలు చేసింది. పైగా ఆంధ్రప్రదేశ్‌లో విడుదల కాకుండానే వర్మ ఈ ఫీట్‌ని సాధించడం విశేషం. ఇదిలాఉంటే ప్రస్తుతం థియేటర్స్‌లో ‘లక్ష్మీస్ ఎన్టీఆర్’ మినహా మరే ఇతర సినిమాలు లేకపోవడం.. వచ్చే శుక్రవారం వరకూ ‘లక్ష్మీస్ ఎన్టీఆర్’ కలెక్షన్లకు ఢోకా లేదనే చెప్పాలి. ఏప్రిల్ 5న సమంత, నాగ చైతన్య ‘మజిలీ’ చిత్రం విడుదల కానుండటంతో అప్పటి వరకూ వర్మ హవా కొనసాగనుంది.