యువ్ న్యూస్ ఫిల్మ్ బ్యూరో:

ఇద్దరమ్మాయిలు, నాయక్, జెండాపై కపిరాజు తదితర చిత్రాలతో తెలుగు ప్రేక్షకులకు దగ్గరైన అమలాపాల్.. తమిళంలో ‘ఆడై’ సినిమాలో నటిస్తోంది. తెలుగులో ఈ సినిమాను ‘ఆమె’ పేరిట విడుదల చేస్తున్నారు. తాజాగా విడుదలైన ఈ టీజర్‌లో పూర్తి న్యూడ్ లుక్‌లో ఆమె దర్శనం ఇచ్చి అందర్నీ ఆశ్చర్యపరిచింది. సినిమా కథ డిమాండ్ చేయడంతోనే ఆమె ఇలా నగ్నంగా కనిపించారని టీజర్‌ను చూస్తే అర్థం అవుతోంది. ఈ సినిమా టీజర్‌ను అమలాపాట్ ట్విట్టర్ ద్వారా ప్రేక్షకుల ముందుకు తీసుకొచ్చారు. ఆడై టీజర్‌ను బాలీవుడ్ దర్శక నిర్మాత కరణ్ జోహర్ రిలీజ్ చేశారు. రత్న కుమార్ ఈ మూవీకి దర్శకత్వం వహించగా.. వీ స్టూడియోస్ నిర్మించింది. విజయ్ కార్తీక్ కన్నన్ సినిమాటోగ్రాఫర్‌గా వ్యవహరించారు. ఆడై సినిమాకు సెన్సార్ బోర్డ్ ‘ఏ’ సర్టిఫికెట్ ఇచ్చింది. టీజర్ ఆరంభంలో తన కుమార్తె కనిపించలేదని ఓ మహిళ పోలీసులకు ఫిర్యాదు చేస్తుంది. తాను ఫోన్ చేసినప్పుడు తాగి ఉందని చెబుతుంది. పోలీసులు ఆమెను వెతుక్కుంటూ ఓ పెద్ద భవంతిలోకి వెళ్తారు. కామిని అనే పాత్రలో నటించిన అమలా పాల్.. ఓ క్లిష్ట పరిస్థితి నుంచి గట్టెక్కుతుందని టీజర్‌ను చూస్తే అర్థం అవుతోంది.