ఫేస్‌బుక్ ఖాతాలను ప్రతి ఒక్కరు డిలీట్ చేయాలని వాట్సాప్ సహ వ్యవస్థాపకుడు బ్రియన్ ఆక్టన్ పిలుపు నిచ్చారు. పొలిటికల్ డేటా అనాలసిస్ కంపెనీ కేంబ్రిడ్జ్ అనలిటికా యూజర్ల అనుమతి లేకుండా ఏకంగా 5 కోట్ల మంది ఖాతాదారుల డేటాను ఉపయోగించుకున్నట్టు వార్తలు వచ్చాయి. ఫేస్‌బుక్ యూజర్ల డేటాను కేంబ్రిడ్జ్ అనలిటికా అనధికారికంగా ఉపయోగించుకుందన్న వార్తలతో ఫేస్‌బుక్ షేర్లు సోమవారం ఒక్కసారిగా ఏడుశాతం పడిపోయాయి. ఎన్నికలను ప్రభావితం చేసే ఉద్దేశంతోనే ఈ పనిచేసినట్టు వార్తలు రావడంతో సోమవారం ఫేస్‌బుక్ దారుణంగా నష్టపోయింది.ఈ  నేపథ్యంలో ఆక్టన్ ఈ పిలుపు నివ్వడం గమనార్హం. కాగా వాట్సాప్‌ను 2014లో ఫేస్‌బుక్ 19 బిలియన్ డాలర్లకు సొంతం చేసుకుంది. వాట్సాప్‌ను అమ్మేసినప్పటికీ ఆక్టన్ మాత్రం ఈ ఏడాది జనవరి వరకు కొనసాగారు. అయితే మరో కంపెనీని స్థాపించాలనే ఉద్దేశంతో ఈ ఏడాది మొదట్లో వాట్సాప్ నుంచి బయటకు వచ్చారు. 2016 అమెరికా అధ్యక్ష ఎన్నికల సమయంలో డొనాల్డ్ ట్రంప్‌కు ప్రచార బాధ్యతలు నిర్వహించిన బ్రిటిష్ సంస్థ కేంబ్రిడ్జ్ అనలిటికా 5 కోట్ల మంది ఫేస్‌బుక్ యూజర్ల లైకులను అనధికారికంగా ఉపయోగించుకుంది.ఈ ఘటనపై స్పందించిన ఫేస్‌బుక్ కేంబ్రిడ్జ్ అనలిటికాపై సమగ్ర ఆడిట్ నిర్వహించనున్నట్టు పేర్కొంది. యూజర్ డేటాను దొంగిలించేందుకు అవసరమైన యాప్ రూపొందించిన కేంబ్రిడ్జ్ యూనివర్సిటీ సైకాలజిస్ట్ అలెక్సాండర్ కోగన్ ఈ విషయంలో తమకు సహకరిస్తామని చెప్పారని ఫేస్‌బుక్ తెలిపింది. అలెక్సాండర్ కోగన్‌తో కలిసి పనిచేసిన కెనడాకు చెందిన డేటా నిపుణుడు క్రిస్టఫర్ వైలీనే ఫేస్‌బుక్ డేటా లీక్‌ను మీడియా ఎదుట బయటపెట్టడం గమనార్హం.