కుప్పకూలిన స్టాక్ మార్కెట్లు
ముంబై, ఫిబ్రవరి 24
దేశీ స్టాక్ మార్కెట్ కుప్పకూలింది. బెంచ్‌మార్క్ సూచీలు సోమవారం పతనమయ్యాయి. కరోనా వైరస్ దెబ్బకు మార్కెట్ భారీగా నష్టపోయింది. చైనాకు వెలుపల ఇతర దేశాల్లో కరోనా వైరస్ వ్యాప్తి చెందడంతో అంతర్జాతీయ మార్కెట్లు పడిపోయాయి. దీంతో ఆ ఎఫెక్ట్ మన మార్కెట్‌పై కూడా కనిపించింది. ఒక్క రోజుల్లోనే ఇన్వెస్టర్ల సంపద రూ.3 లక్షల కోట్లకు పైగా ఆవిరయ్యింది.
ఇంట్రాడేలో బీఎస్‌ఈ సెన్సెక్స్ 864 పాయింట్ల మేర పతనమైంది. నిఫ్టీ కూడా 12 వేల మార్క్ దిగువకు పడిపోయింది. 11,813 స్థాయికి క్షీణించింది. ప్రపంచ ఆర్థిక వ్యవస్థపై కరోనా ఎఫెక్ట్ గట్టిగానే ఉండొచ్చనే అంచనాలు ఇందుకు కారణం. చివరకు సెన్సెక్స్ 807 పాయింట్ల నష్టంతో 40,363 పాయింట్ల వద్ద క్లోజయ్యింది. నిఫ్టీ 251 పాయింట్ల నష్టంతో 11,829 పాయింట్ల వద్ద ముగిసింది. బడ్జెట్ తర్వాతి నుంచి చూస్తే.. ఈ స్థాయి మార్కెట్ పడిపోవడం ఇదే తొలిసారి.
✺ నిఫ్టీ 50లో గెయినర్స్ అంటూ ఏమీ లేవు. అన్ని షేర్లు నష్టపోయాయి. జేఎస్‌డబ్ల్యూ స్టీల్, వేదాంత, టాటా స్టీల్, హిందాల్కో, టాటా మోటార్స్ షేర్లు ఎక్కువగా నష్టపోయాయి. జేఎస్‌డబ్ల్యూ స్టీల్ 7 శాతానికి పైగా పడిపోయింది.
✺ నిఫ్టీ‌ సెక్టోరల్ ఇండెక్స్‌లన్నీ నష్టాల్లోనే క్లోజయ్యాయి. నిఫ్టీ మెటల్ ఇండెక్స్ ఏకంగా 5 శాతం కుప్పకూలింది. నిఫ్టీ ఫార్మా, నిఫ్టీ ఆటో ఇండెక్స్‌లు 3 శాతం పతనమయ్యాయి. నిఫ్టీ రియల్టీ, నిఫ్టీ పీఎస్‌యూ బ్యాంక్, నిఫ్టీ మీడియా ఇండెక్స్‌లు 2 శాతానికి పైగా నష్టపోయాయి. ఇక మిగతా ఇండెక్స్‌లన్నీ 1 శాతానికి పైగా పడిపోయాయి.
✺ అమెరికా డాలర్‌తో పోలిస్తే ఇండియన్ రూపాయి నష్టాల్లోనే ట్రేడవుతోంది. దాదాపు 24 పైసలు క్షీణతతో 71.90 వద్ద కదలాడుతోంది.
✺ అంతర్జాతీయ మార్కెట్‌లో క్రూడాయిల్ (ముడి చమురు) భారీగా తగ్గాయి. బ్రెంట్ క్రూడ్ ధర బ్యారెల్‌కు 3.61 శాతం క్షీణతతో 55.84 డాలర్లకు దిగొచ్చింది. డబ్ల్యూటీఐ క్రూడ్ ధర బ్యారెల్‌కు 3.62 శాతం తగ్గుదలతో 51.46 డాలర్లకు క్షీణించింది