విజయవాడ, జనవరి 19 
మంత్రి కొడాలి నాని ఘాటు వ్యాఖ్యలు.. మాజీ మంత్రి దేవినేని ఉమా సవాళ్ల మధ్య బెజవాడ రాజకీయం వేడెక్కింది. గొల్లపూడి ఎన్టీఆర్ విగ్రహం వద్ద దీక్ష చేపడతానని.. దమ్ముంటే తనను టచ్ చేయాలని.. కొడాలి నానికి సవాల్ విసిరిన ఉమను పోలీసులు అరెస్ట్ చేశారు. దీంతో గొల్లపూడిలో ఉద్రిక్తత తలెత్తింది. అక్కడికి భారీగా చేరుకున్న టీడీపీ శ్రేణులను పోలీసులు అడ్డుకున్నారు. ఈ క్రమంలో పోలీసులు, టీడీపీ కార్యకర్తల మధ్య తోపులాట చోటు చేసుకుంది.‘మీ బూతుల మంత్రి వ్యాఖ్యలకు నిరసనగా గొల్లపూడిలో ఎన్టీఆర్ విగ్రహం దగ్గర కూర్చుంటా అంటే ఎందుకంత భయం? టచ్ చేస్తామని సవాల్ చేసి ఒక్కడి కోసం వేలమంది పోలీసులను పంపిస్తావా? మీ ప్రభుత్వ నియంతృత్వ పాలనకు ప్రజలు భయపడరు. ప్రజాబలాన్ని అధికార దుర్వినియోగంతో అడ్డుకోలేరని తెలుసుకోండి జగన్’’ అంటూ దేవినేని ఉమ ట్వీట్ చేశారు. అక్కడ భారీగా మోహరించిన పోలీసుల వీడియోను ఆయన షేర్ చేశారు.గొల్లపూడిలో సోమవారం జరిగిన ఇళ్ల పట్టాల పంపిణీ కార్యక్రమంలో మంత్రి కొడాలి నాని పాల్గొన్నారు. ఈ సందర్భంగా ఆయన మాట్లాడుతూ.. సీఎం జగన్‌ గురించి ఇష్టం వచ్చినట్లు మాట్లాడితే.. తన చేతిలోనో లేదంటే.. కృష్ణప్రసాద్‌, వల్లభనేని వంశీ చేతిలోనో దెబ్బలు తినక తప్పదని దేవినేని ఉమను హెచ్చరించారు. ‘మైలవరం నియోజకవర్గం వచ్చి మాట్లాడుతున్నా. ఎప్పుడైనా ఇక్కడికి వస్తా. మీ చంద్రబాబు ఏం చేశారో? మా జగన్‌ ఏం చేశారో చెబుతా. మీ ఇంట్లో అయినా సరే.. చర్చకు నేను రెడీ’ అని ఉమకు కొడాలి నాని సవాల్‌ విసిరారు. ఇష్టమొచ్చినట్లు మాట్లాడితే ఇంటికొచ్చి బడితె పూజ చేస్తానని వార్నింగ్ ఇచ్చారు. మంత్రి మాటలకు ధీటుగా స్పందించిన ఉమ.. దమ్ముంటే టచ్ చేయాలని సవాల్ విసిరారు.