న్యూఢిల్లీ, మే 20, 
రోనా మహమ్మారి నుంచి కోలుకున్న వారిని బ్లాక్ ఫంగస్ కలవరపెడుతోంది. కరోనా సెకండ్ వేవ్‌లో ఇప్పటికే లక్షల మంది వైరస్ బారిన పడ్డారు. మహమ్మారి నుంచి కోలుకున్నా బ్లాక్ ఫంగస్ వ్యాప్తి చెందుతుండడం ఆందోళన రేపుతోంది. దేశంలో కర్ణాటక, ఉత్తరాఖండ్, రాజస్థాన్‌, తెలంగాణ, ఆంధ్రప్రదేశ్, మధ్యప్రదేశ్‌లో బ్లాక్ ఫంగస్ కేసులు నమోదయ్యాయి. బ్లాక్ ఫంగస్ కారణంగా ఇప్పటికే మహారాష్ట్రలో 90 మందికి పైగా ప్రాణాలు కోల్పోయారు. రోజురోజుకీ బ్లాక్‌ ఫంగస్ కేసులు పెరుగుతుండడంతో వ్యాధిని గుర్తించడం.. లక్షణాలు.. తీసుకోవాల్సిన జాగ్రత్తలపైఢిల్లీ ఎయిమ్స్ కీలక సూచనలు చేసింది.
బ్లాక్ ఫంగస్ లక్షణాలు..
* ముక్కు నుంచి రక్తం కారడం లేదా నల్లటి స్రావాలు రావడం.
* ముక్కు బిగదీసుకుపోవడం.
* తలనొప్పి, కన్ను నొప్పి, కంటి చుట్టూ వాపు రావడం, ఒకటి రెండుగా కనిపించడం, కళ్లు ఎర్రబారడం, కంటి చూపు కోల్పోవడం, కళ్లు మూయడంతో ఇబ్బందులు, కళ్లు తెరవలేకపోవడం..
* ముఖం తిమ్మిరిగా.. జలదరించినట్లు అనిపించడం.
* ఆహారం నమలలేకపోవడం, నోరు తెరవలేకపోవడం.
ఎవరికి ప్రాణాంతకం?
*షుగర్ లెవెల్స్‌ నియంత్రణలో లేనివారు, స్టెరాయిడ్స్ తీసుకుంటున్న డయాబెటిక్ పేషెంట్లు, కీటోన్లు అత్యధికంగా విడుదలవుతున్న షుగర్ పేషెంట్లు.
* క్యాన్సర్ చికిత్స తీసుకుంటున్న రోగులు, దీర్ఘకాలిక వ్యాధులు ఉన్నవారు.
* అధిక మొత్తంలో స్టెరాయిడ్స్ తీసుకుంటున్నవారు.
* కోవిడ్ తీవ్రత ఎక్కువగా ఉండి వెంటిలేటర్ చికిత్స తీసుకున్నవారికి ముప్పు ఎక్కువ.
ఫంగస్ సోకితే ఏం చేయాలంటే.!
* వెంటనే ఈఎన్‌టీ డాక్టర్‌ లేదా ఆప్తమాలజిస్ట్‌ని సంప్రదించాలి.
* షుగర్ లెవెల్స్ అదుపులో ఉంచుకోవాలి. ఎప్పటికప్పుడు షుగర్ లెవెల్స్ సరిచూసుకోవాలి.
* సొంత వైద్యం చేసుకోకూడదు. వైద్యులు సూచిస్తేనే స్టెరాయిడ్స్, యాంటీ బయాటిక్స్, యాంటీ ఫంగల్ డ్రగ్స్ వాడాలి.
* అవసరమైతే ఎమ్మారై, సీటీ స్కాన్ చేయించుకోవాలి.