హైదరాబాద్, మే 2 
తెలంగాణలో పార్లమెంట్ ఎన్నికల ప్రచారం రసవత్తరంగా సాగుతోంది. అన్ని ప్రధాన పార్టీలు ప్రచారాన్ని హోరెత్తిస్తున్నాయి. అసెంబ్లీ ఎన్నికల ఫలితాలు రిపీట్ చేయాలని కాంగ్రెస్ భావిస్తుండగా.. సీట్ల సంఖ్య పెంచుకోవాలని బీజేపీ యోచిస్తోంది. ఇక పార్లమెంట్ ఎన్నికల్లో అత్యధిక స్థానాలు కైవసం చేసుకొని అసెంబ్లీ ఎన్నికల్లో ఓటమిని కప్పిపుచ్చుకోవాలని బీఆర్ఎస్ వ్యూహాలు రచిస్తోంది. గులాబీ బాస్ కేసీఆర్ బస్సు యాత్ర ద్వారా ప్రజల్లోకి వెళ్లి తమ పార్టీ అభ్యర్థుల తరపున ప్రచారం ముమ్మరం చేశారు. అయితే బీఆర్ఎస్ పార్టీకి ఒక విషయం మాత్రం టెన్షన్ పెడుతోంది. ఎన్నికలు జరిగిన ప్రతిసారీ గులాబీ దళంలో ఇదే గుబులు కనిపిస్తోంది.ప్రతి ఎన్నికల్లో పార్టీల గుర్తులు చాలా కీలకం. ఆ గుర్తులను చూసే ప్రజలు ఓట్లు వేస్తుంటారు. ఒకే రకమైన గుర్తులుంటే చాలా మంది కన్‌ఫ్యూజ్ అవుతుంటారు. ముఖ్యంగా వృద్ధులకు ఇబ్బంది కలుగుతుంది. తాము వేయాల్సిన పార్టీకి బదులు.. తికమకకు గురై వేరొక పార్టీకి వేసే ప్రమాదముంది. బీఆర్ఎస్‌లో ఇప్పుడు ఇదే టెన్షన్ పెడుతోంది. బీఆర్ఎస్ ఎన్నికల గుర్తు కారును పోలిన గుర్తులు చాలా ఉన్నాయి. వాటిలో రోడ్డు రోలర్, చపాతీ మేకర్ వంటివి అచ్చం కారులాగే కనిపిస్తాయి. గత అసెంబ్లీ ఎన్నికల్లో కలవరపాటుకు గురి చేసిన ఈ గుర్తులు మరోసారి పార్లమెంట్ ఎన్నికల్లోనూ అభ్యర్థులను బయపెడుతున్నాయి.సికింద్రాబాద్‌లో యుగతులసి పార్టీ అభ్యర్థి శివ కుమార్‌కు రోడ్డు రోలర్ గుర్తును కేటాయించారు. ఈవీఎం మెషీన్‌లో బీఆర్ఎస్ అభ్యర్థి పద్మారావు గౌడ్ కారు గుర్తు నాలుగో స్థానంలో ఉండగా.. రోడ్డు రోలర్ గుర్తు 5వ స్థానంలో ఉంది. పోలిన గుర్తులు ఒకే చోట ఉండటంతో ఓటర్లు కన్‌వ్యూ్జ్ అయ్యే ప్రమాదం ఉందని బీఆర్ఎస్ శ్రేణులు ఆందోళన వ్యక్తం చేస్తున్నాయి. ఇక హైదరాబాద్ పార్లమెంట్ నియోజకవర్గంలో ఓ స్వతంత్ర అభ్యర్థికి చపాతీ మేకర్ గుర్తును కేటాయించారు. అది కూడా కారు గుర్తును పోలి ఉండటంతో బీఆర్ఎస్ అభ్యర్థికి టెన్షన్ మెుదలైంది.అయితే కారును పోలిన గుర్తులను రద్దు చేయాలని కోరుతూ అసెంబ్లీ ఎన్నికల సమయంలో బీఆర్ఎస్ శ్రేణులు సుప్రీం కోర్టును ఆశ్రయించగా.. న్యాయస్థానం తిరస్కరించింది. ఫ్రీసింబల్స్‌ను తొలగించలేమని స్పష్టం చేసింది. సుప్రీంకోర్టు నిర్ణయంతో గులాబీ దళంలో ఎప్పటిలాగే ఈసారి కూడా గుబులు మొదలయింది.