బాలీవుడ్ హీరో సంజయ్ దత్ బయోపిక్ ‘సంజూ’ రికార్డు స్థాయి వసూళ్లను సాధించిందని ప్రకటిస్తున్నారు ట్రేడ్ పండితులు. ఈ సినిమా రణ్‌బీర్ కపూర్ కెరీర్‌లోనే బెస్ట్ గ్రాస్ వసూళ్లను సాధించిందని వారు వివరిస్తున్నారు. హిందీ సినిమాల వసూళ్ల జాబితాలో సంజూ టాప్ ఫైవ్‌లో ఒకటిగా ఉంటుందని, ఫోర్త్ హయ్యెస్ట్ గ్రాసింగ్ ఫిల్మ్‌గా నిలుస్తోందని చెబుతున్నారు. ఈ మేరకు ట్రేడ్ నిపుణుడు తరణ్ ఆదర్శ్ ఒక ట్వీట్ పెట్టాడు.  ‘సంజూ’ సినిమా 339.75 కోట్ల రూపాయల గ్రాస్ వసూళ్లను సాధించిందని తరణ్ ప్రకటించాడు. తద్వారా ఈ సినిమా సల్మాన్ ఖాన్ సినిమా ‘టైగర్ జిందా హై’ లైఫ్ టైమ్ వసూళ్లను అధిగమించిందని ఆయన పేర్కొన్నాడు. ఇక ‘పీకే’ వసూళ్ల రికార్డును అందుకోవడానికి ‘సంజూ’ పరుగులు తీస్తోందని తరణ్ తన ట్వీట్లో పేర్కొన్నాడు. బాలీవుడ్ లో ఇప్పుడు ఏ సినిమా అయినా వారం పది రోజుల ప్రదర్శనకే పరిమితం అవుతోంది. సినిమాలకు అక్కడ కూడా లాంగ్ రన్ లేదు. అయినప్పటికీ సంజయ్ దత్ బయోపిక్ నెల రోజుల తర్వాత కూడా ఇంకా వీక్షకులను థియేటర్లకు రప్పించగలుగుతోంది. తద్వారా సూపర్ హిట్ అనిపించుకుంటోంది. ప్రీ రిలీజ్ మార్కెట్లో ఈ సినిమా దాదాపు 230 కోట్ల రూపాయల వ్యాపారాన్ని చేసిందని తెలుస్తోంది. ప్రస్తుత వసూళ్లతో ఈ సినిమా డిస్ట్రిబ్యూటర్లు అందరికీ లాభాలను తెచ్చిపెట్టినట్టే అని విశ్లేషకులు అంటున్నారు.