రాజ్యసభ డిప్యూటీ చైర్మన్ ఎన్నికలో తాము ఎన్డీయే అభ్యర్థికి వ్యతిరేకంగా ఓటు వేస్తామని ప్రకటించింది వైఎస్సార్ కాంగ్రెస్ పార్టీ. ఎన్డీయేతర, యూపీయేతర పార్టీగా ఉన్న వైఎస్సార్ కాంగ్రెస్ ఈ మేరకు ఒక ప్రకటన చేసింది. రాజ్యసభ డిప్యూటీ చైర్మన్ ఎన్నికలో ప్రతి ఓటూ కీలకంగా మారిన సంగతి తెలిసిందే. తమ అభ్యర్థిని గెలిపించుకోవడం అధికార ఎన్డీయేకు ప్రతిష్టాత్మకంగా మారింది. అయితే రాజ్యసభలో ఎన్డీయేతర సభ్యుల సంఖ్య ఎక్కువగా ఉంది. ఈ నేపథ్యంలో తటస్థ పార్టీల ఓట్లు చాలా కీలకంగా మారాయి.  ఇరు పక్షాలూ ఇప్పటికే ఈ ఓట్ల విషయంలో సంప్రదింపులు జరుపుతున్నాయి. ఈ పరిణామాల మధ్యన తాము ఎన్డీయే అభ్యర్థికి వ్యతిరేకంగా ఓటు వేస్తామని వైఎస్సార్ కాంగ్రెస్ పార్టీ ప్రకటించడం ఆసక్తిదాయకంగా మారింది.రాష్ట్రానికి ప్రత్యేకహోదా విషయంలో భారతీయ జనతా పార్టీ మోసం చేసిందని, ఆ పార్టీ మోసపూరిత వైఖరికి నిరసనగానే తాము ఎన్డీయే అభ్యర్థికి ఓటు వేయడం లేదని వైఎస్సార్ కాంగ్రెస్ పార్టీ ఎంపీ వి.విజయసాయి రెడ్డి ప్రకటించారు. రాజ్యసభ డిప్యూటీ చైర్మన్ ఎన్నికలో జేడీయూ పార్టీకి చెందిన నేతను అభ్యర్థిగా బరిలోకి దించింది ఎన్డీయే. ఈ మేరకు జేడీయూ నేత, బిహార్ ముఖ్యమంత్రి నితీష్ కుమార్ మద్దతు కోసం వివిధ పార్టీలను సంప్రదిస్తున్నారు.