సంక్రాంతి వస్తే.. అసలు సిసలు సినిమా సందడి మొదలైనట్టే. ఈ సీజన్ కోసం దర్శక నిర్మాతలు ఎంత గానో ఎదురు చూస్తారు. దీనికి కారణం సంక్రాంతి సీజన్‌లో బాక్సాఫీస్ ఫైట్ చాలా ఇంట్రస్టింగ్‌‌గా ఉంటుంది. ఈ సీజన్‌లో విడుదలైన సినిమాలకు హిట్ టాక్ వస్తే.. కలెక్షన్ల కుమ్ముడు కుమ్మేయొచ్చు. ఇక యావరేజ్ సినిమాలకు కనకవర్షం కురుస్తుంది. అందుకే సంక్రాంతి బరిలో నిలిచేందుకు ముందు నుండి పక్కా ప్రణాళికలతో సినిమాలను రూపొందిస్తారు. ఇక ఎప్పటిలాగే ఈ ఏడాది నాలుగు పెద్ద సినిమాలు బాక్సాఫీస్ బరిలో నిలుస్తుండటంతో మూవీ లవర్స్‌కి పండగనే చెప్పాలి. ఈ సంక్రాంతికి నందమూరి బాలకృష్ణ ప్రతిష్ఠాత్మక ప్రాజెక్ట్ ‘ఎన్టీఆర్ బయోపిక్’ మూవీపై భారీగా అంచనాలు ఉన్నాయి. ఈ చిత్రంతో పాటు రామ్ చరణ్, బోయపాటి కాంబో మూవీ ‘వినయ విధేయ రామ’, వెంకటేష్, వరుణ్ తేజ్ మల్టీస్టారర్ మూవీ ‘F2’ చిత్రాలతో పాటు సూపర్ స్టార్ రజినీకాంత్ ‘పేటా’ చిత్రం కూడా సంక్రాంతికి విడుదల కానున్నాయి. ఎన్టీఆర్ బయోపిక్ చిత్రాన్ని రెండు పార్టులుగా విడుదల చేస్తుండగా.. తొలి భాగం ‘ఎన్టీఆర్ కథానాయకుడు’ జనవరి 9న విడుదల కానుండగా.. ‘పేటా’ జనవరి 10న, ‘వినయ విధేయ రామ’ జనవరి 11న, ‘F2’ జనవరి 12న విడుదల కానున్నాయి. వరుసగా నాలుగు రోజులు నాలుగు చిత్రాలతో టాలీవుడ్ బాక్సాఫీస్ కళకళలాడనుంది. అయితే ఈ నాలుగు చిత్రాల్లోనూ ‘ఎన్టీఆర్ బయోపిక్’ మూవీ ‘కథానాయకుడు’ చిత్రం కోసం సినీ, రాజకీయ వర్గాల్లో అమితాసక్తి ఉంది. ఇందులో ఎన్టీఆర్‌ని ఎలా చూపించబోతున్నారనే కుతూహలం ప్రేక్షకుల్లో ఉంది. దీనికి తగ్గట్లు బాలకృష్ణ సంక్రాంతి ట్రాక్ రికార్డ్ కూడా బాక్సాఫీస్‌ను షేక్ చేసేదిగా ఉండటంతో ఈ సినిమాపై విపరీతమైన అంచనాలు ఏర్పాడ్డాయి. 2016 సంక్రాంతికి ‘డిక్టేటర్‌’గా ప్రేక్షకుల ముందుకు వచ్చాడు. ఆ తరువాత 2017లో ‘గౌతమి పుత్ర శాతకర్ణి’ అంటూ వందో చిత్రం బాక్సాఫీస్‌ని షేక్ చేశారు. ఖైదీ, శతమానం భవతి చిత్రాలు హిట్ టాక్ తెచ్చున్నప్పటికీ బాక్సాఫీస్ వద్ద సత్తాచాటాడు బాలయ్య. అనంతరం 2018లో ‘జై సింహా’ అంటూ సంక్రాంతి బరిలో తొడకొట్టాడు బాలయ్య. పవన్ కళ్యాణ్ ‘అజ్ఞాతవాసి’.. రాజ్ తరుణ్ ‘రంగుల రాట్నం’.. సూర్య ‘గ్యాంగ్’ చిత్రాలను వెనక్కినెట్టి సత్తా చాటాడు బాలయ్య. అయితే అత్యంత భారీ అంచనాలతో, భారీ ప్రీ రిలీజ్ మార్కెట్‌తో విడుదల అయిన సినిమాలు.. అంచనాలను అందుకోలేకపోయాయి. బాక్సాఫీస్ వద్ద ఈ సినిమాలు ప్రీలీజ్ మార్కెట్‌కు తగిన కలెక్షన్లను అందుకోలేకపోయాయి. వాస్తవానికి సంక్రాంతికి మరిన్ని సినిమాలు విడుదల కావాల్సింది. అయితే.. అజ్ఞాతవాసి సినిమాకు భయపడి చాలా సినిమాలు విడుదలను వాయిదా వేసుకున్నాయి. అలా అన్ని సినిమాలనూ బెదరగొట్టిన అజ్ఞాతవాసి సత్తా చూపించలేకపోయింది. తొలి షో దగ్గర నుంచినే డివైడ్ టాక్‌తో ఈ సినిమా డిజాస్టర్‌గా నిలిచింది. మొత్తానికి ఆ సంక్రాంతి సీజన్‌లో బాలయ్య ‘జై సింహా’ మాత్రమే కలెక్షన్లను రాబట్ట గలిగింది.Learnmore