ఆస్ట్రేలియాతో తొలి టెస్టుకి ముందు భారత్ ఓపెనర్ మురళీ విజయ్ జూలు విదిల్చాడు. క్రికెట్ ఆస్ట్రేలియా ఎలెవన్ టీమ్‌తో సిడ్నీ వేదికగా ఈరోజు ముగిసిన నాలుగు రోజుల ప్రాక్టీస్ మ్యాచ్‌లో మెరుపు శతకం బాదిన మురళీ విజయ్ జట్టులో పునరాగమనానికి మార్గం సుగుమం చేసుకున్నాడు. ఫీల్డింగ్ చేస్తూ యువ ఓపెనర్ పృథ్వీ షా గాయపడటంతో.. తొలి టెస్టులో ఆడేందుకు మురళీ విజయ్‌కి లైన్ క్లియరైంది. కానీ.. అతని పేలవ ఫామ్‌ నేపథ్యంతో.. అవకాశం ఇవ్వాలా..? వద్దా..? అనే మీమాంసలో టీమిండియా ఉండేది. అయితే.. ఈరోజు మెరుపు శతకంతో ఫామ్‌ని చాటుకున్న విజయ్ జట్టు బెంగని తీర్చేశాడు..!డ్రాగా ముగిసిన ఈ ప్రాక్టీస్ మ్యాచ్‌లో స్పిన్నర్ జేక్ కార్డర్ వేసిన ఓ ఓవర్‌లో మురళీ విజయ్ విశ్వరూపం చూపాడు. అప్పటికి వ్యక్తిగత స్కోరు 74 వద్ద ఉన్న మురళీ విజయ్.. ఆ ఓవర్‌లో వరుసగా 4, 4, 6, 2, 6, 4 రూపంలో 26 పరుగులు బాదేసి శతకాన్ని పూర్తి చేసుకున్నాడు.