నేటి సమాజంలో అక్రమ సంబంధాలు ఎంత దారుణాలకు పాల్పడుతున్నాయో చూస్తూనే ఉన్నాం. శారీరక సుఖం కోసం జీవిత భాగస్వాముల ప్రాణాలు తీస్తున్న సంఘటనలు కోకొల్లలు. ఈ కోవలోనే వివాహేతర సంబంధానికి అడ్డుగా ఉన్నాడని ఓ మహిళ ప్రియుడితో కలిసి భర్తను పిల్లల ముందే హతమార్చిన సంఘటన ఖమ్మం జిల్లా వైరాలో చోటుచేసుకుంది. సాధారణ మరణంగా చిత్రీకరించేందుకు ప్రయత్నించి పోలీసులకు దొరికేశారు. వైరా పోలీసుల కథనం ప్రకారం.. జూలూరుపాడుకు చెందిన షేక్‌ హమీదాను వైరాకు చెందిన అబ్దుల్లా (27) ఏడేళ్ల క్రితం వివాహం చేసుకున్నాడు. వీరికి ఇద్దరు కుమార్తెలు ఉన్నారు. ఎలక్ట్రీషియన్‌గా పని చేస్తున్న అబ్దుల్లా స్థానిక మండల పరిషత్తు కార్యాలయం సమీపంలో కుటుంబంతో కలిసి ఉంటున్నాడు. ఇటీవల కాలంలో తనకు పరిచయమైన షేక్ అక్బర్(21)తో హమీదా వివాహేతర సంబంధం నెరుపుతోంది. ఈ విషయం తెలుసుకున్న అబ్దుల్లా భార్యను మందలించాడు. అయినా బుద్ధి మారని హమీదా భర్త లేని సమయంలో ప్రియుడిని రప్పించుకుని సంబంధాన్ని కొనసాగిస్తోంది. ఇదే విషయమై ఐదు రోజుల క్రితం అబ్దుల్లా, అక్బర్ మధ్య ఘర్షణ కూడా చోటుచేసుకుంది. ఈ నేఫథ్యంలో అబ్దుల్లాను అడ్డు తొలగించుకుంటే తామిద్దరం హాయిగా అనైతిక బంధాన్ని కొనసాగించవచ్చని అనుకున్న హమీదా, అక్బర్ అతడిని చంపేందుకు పథకం పన్నారు. గురువారం గాఢ నిద్రలో ఉన్న అబ్దుల్లాను అక్బర్ మెడ పట్టుకుని ఊపిరాడకుండా చేస్తే హమీదా అతడి కాళ్లు పట్టుకుంది. కాసేపటి తర్వాత అబ్దుల్లా చనిపోగా అక్బర్ అక్కడి నుంచి వెళ్లిపోయాడు. తన భర్త మూర్ఛ కారణంగా చనిపోయాడని హమీదా అందరినీ నమ్మించింది. శుక్రవారం ఉదయం విషయం తెలుసుకున్న ఏసీపీ ప్రసన్నకుమార్‌, సీఐ రమాకాంత్‌, ఎస్సై నరేశ్‌ అక్కడకు చేరుకుని విచారణ చేపట్టారు. అబ్దుల్లా మృతిపై అనుమానాలు ఉండటంతో లోతుగా విచారించారు. భార్యను, అక్బర్‌ను అదుపులోకి తీసుకుని విచారించడంతో తామే హత్య చేసినట్లు ఒప్పుకొన్నారు. తన తండ్రిని అక్బరే చంపినట్లు నాలుగేళ్ల వయసున్న అబ్దుల్లా కుమార్తె పోలీసులకు వాంగ్మూలం ఇవ్వడం గమనార్హం.