వాఘా స‌రిహ‌ద్దు వ‌ద్ద ప్రతి రోజు నిర్వహించే బీటింగ్ రిట్రీట్‌ను శుక్రవారం  ర‌ద్దు చేశారు. అమృత్‌సర్ డిప్యూటీ కమిషనర్ శివ్ దులార్ సింగ్ దిల్లాన్ ఈ విషయాన్ని వెల్లడించారు. పాక్ నిర్బంధంలో ఉన్న భారత వాయుసేన వింగ్ కమాండర్ అభినందన్‌ను భారత్‌కు అప్పగించనున్న నేపథ్యంలో ఈ నిర్ణయం తీసుకున్నట్లు తెలుస్తోంది. భార‌త వైమానిక ద‌ళానికి చెంది సీనియ‌ర్ అధికారులతో కూడిన బృందం.. ఐఏఎఫ్ పైలట్ అభినంద‌న్‌ను రిసీవ్ చేసుకుంటార‌ని దులార్ సింగ్ దిల్లాన్ తెలిపారు. వింగ్ క‌మాండ‌ర్ అభినంద‌న్‌ను పాక్ మ‌రికాసేప‌ట్లో వాఘా బోర్డర్ వ‌ద్ద భార‌త్‌కు అప్పగించనుంది. అభినందన్‌కు స్వాగతం పలకడానికి ఇప్పటికే అక్కడ భారతీయులు భారీ సంఖ్యలో చేరుకున్నారు. భారత్ మాతా కీ జై నినాదాలతో వాఘా బోర్డర్ మార్మోగుతోంది. అభినందన్‌కు స్వయంగా స్వాగతం పలుకుదామని పంజాబ్ సీఎం అమరీందర్ సింగ్ తొలుత భావించారు. ప్రోటోకాల్ నేప‌థ్యంలో అభినంద‌న్‌ను స్వాగ‌తించేందుకు వెళ్లడం లేద‌ని ఆయన తెలిపారు. మిలిటరీ లాంఛనాల ప్రకారం.. అభినందన్‌ను వారి వెంట తీసుకెళ్లి మొదట వైద్య పరీక్షలు నిర్వహించనున్నట్లు తెలుస్తోంది.