ఇటీవల కాలంలో చిన్నచిన్న విషయాలకే జీవిత భాగస్వాములను హత్యచేస్తున్న ఉదంతాలు చూస్తూనే ఉన్నాం. అక్రమ సంబంధాలు, ఆర్థిక విషయాలు, వివాహ జీవితంలో అసంతృప్తి.. ఇలా కారణలేవైనా చివరకు ఒకరో ఒకరు ప్రాణాలు కోల్పోతున్నారు. పెళ్లై మూడేళ్లయినా పిల్లలు పుట్టకపోవడంతో పాటు భార్య సోషల్‌మీడియాలో వినియోగిస్తుండటంతో విసుగు చెందిన ఓ సాఫ్ట్‌వేర్ ఇంజినీర్ ఆమె ప్రాణాలు తీశాడు. కరెంట్ షాక్ ఇచ్చి హత్యచేసి ప్రమాదంగా చిత్రీకరించాడు. చివరకు పోలీసులకు చిక్కి కటకటాలు లెక్క పెడుతున్నాడు. నెల్లూరుకు చెందిన శ్రీనివాసరెడ్డి(32)కి వెంకటమ్మ(30) అనే యువతితో వివాహమైంది. పెళ్లై మూడేళ్లు గడిచినా పిల్లలు పుట్టకపోవడంతో దంపతుల మధ్య గొడవలు జరుగుతున్నాయి. దీంతో చికిత్స తీసుకుందామని శ్రీనివాస్ అడగ్గా వెంకటమ్మ నిరాకరించింది. దీనికి తోడు ఇటీవల సోషల్‌మీడియాకు బానిససై భర్తను పట్టించుకోవడం లేదు. ఆఫీసు నుంచి ఇంటికి వచ్చే సమయంలో చాటింగ్ హిస్టరీని డిలీట్ చేసేది. దీంతో భార్యపై అనుమానం పెంచుకున్న శ్రీనివాస్‌రెడ్డి అమెను ఎలాగైనా హత్య చేయాలని నిర్ణయం తీసుకున్నాడు.  భార్యకు ఇచ్చిన కూల్‌డ్రింక్‌లో నిద్రమాత్రలు కలిపాడు. ఆమె నిద్రలోకి జారుకున్నాక వాటర్ హీటర్‌తో కరెంట్ షాకిచ్చి చంపేశాడు. తన భార్య కరెంట్ షాక్‌తోనే చనిపోయిందనేందుకు సాక్ష్యంగా ఫోటో తీశాడు. ఆ తర్వాత వెంకటమ్మ చనిపోయిందని బంధువులకు సమాచారం ఇచ్చి స్థానిక పోలీసులకు చెప్పకుండానే ఆదివారం ఉదయం అంబులెన్స్‌లో నెల్లూరుకు మృతదేహాన్ని తీసుకెళ్లాడు. వెంకటమ్మ మృతిపై అనుమానం వ్యక్తం చేసిన ఆమె తల్లిదండ్రులు నెల్లూరు పోలీసులకు ఫిర్యాదు చేశారు. అయితే ఘటన బెంగళూరులో జరగడంతో తాము కేసు నమోదు చేయలేమని చెప్పి ఈ సమాచారాన్ని బెంగళూరు హెచ్ఏఎల్ పోలీసులకు సమాచారం ఇచ్చారు. దీంతో పోలీసులు వెంకటమ్మ మృతదేహాన్ని తిరిగి బెంగళూరుకు తీసుకెళ్లారు. హెచ్ఏఎల్ పోలీసులు వెంకటమ్మ మృతదేహాన్ని స్వాధీనం చేసుకుని ఆస్పత్రికి తరరలించారు. పోస్టుమార్టంలో ఉద్దేశపూర్వక హత్యగా తేలడంతో పోలీసులు శ్రీనివాసరెడ్డిని అదుపులోకి తీసుకుని విచారించగా జరిగిందంతా చెప్పేశాడు. దీంతో పోలీసులు నిందితుడిపై కేసు నమోదు చేసి న్యాయమూర్తి ఎదుట హాజరుపరిచారు. అనంతరం జ్యుడిషియల్ కస్టడీకి తీసుకున్నారు.