YUV News Logo
YuvNews
Open in the YuvNews app
OPEN

ఫ్లాష్ న్యూస్

వార్తలు ఆటలు

పొట్టి ఫార్మేట్ లలో యూవీ రికార్డ్

 పొట్టి ఫార్మేట్ లలో యూవీ రికార్డ్

యువరాజ్ సింగ్ పేరు గుర్తుకురాగానే క్రికెట్ ప్రేక్షకుడి మదిలో మెదిలే ఇన్నింగ్స్ ఇది. 2007లో ఐసీసీ నిర్వహించిన తొలి టీ20 ప్రపంచకప్‌లో యువీ విధ్వంసం మామూలుగా సాగిందా మరి. ఆ టోర్నీ జరిగి 12ఏళ్లయినా ఇప్పటికీ అతడి ఇన్నింగ్స్ కళ్లముందు కదలాడుతూ ఉంటుంది. అదే ఇంగ్లండ్‌పై ఒకే ఓవర్లో ఆరు సిక్సర్ల రికార్డు. పొట్టి ఫార్మాట్లో ఎవరెన్ని విధ్వంసాలు సృష్టించినా, ఎన్ని రికార్డులు నెలకొల్పినా మన యువరాజ్ ఇన్నింగ్స్‌ మాత్రం ఎన్నటికీ మరిచిపోలేనిది. 2007లో జరిగిన తొలి టీ20 ప్రపంచకప్‌లో ఎలాంటి అంచనాల్లేకుండా బరిలోకి దిగింది ధోనీ సారథ్యంలోని టీమిండియా. దీనిలో భాగంగా భీకర ఫామ్‌లో ఉన్న ఇంగ్లండ్‌తో మ్యాచ్ ఆడాల్సి వచ్చింది. తొలుత బ్యాటింగ్‌కు దిగిన భారత్‌కు ఓపెనర్లు గౌతమ్ గంభీర్, వీరేంద్ర సెహ్వాగ్ శతక భాగస్వామ్యం అందించారు. ఆ తర్వాత వరుసగా రెండు వికెట్లు కోల్పోవడంతో ఇన్నింగ్స్ కుదుపునకు లోనైంది. ఆ సమయంలో బరిలోకి వచ్చిన యువీ ఆకాశమే హద్దుగా చెలరేగిపోయాడు. యువరాజ్ బ్యాటింగ్ చేస్తున్న సమయంలో ఇంగ్లండ్ ఆటగాడు ఫ్లింటాఫ్ రెచ్చగొట్టేలా ప్రవర్తించాడు. ఇద్దరి మధ్య మాటామాటా పెరిగింది. అసలే మనోడు మాటపడని రకం. ప్రత్యర్థికి బ్యాటింగ్‌తోనే చుక్కలు చూపాలని ఫిక్స్ అయిపోయాడు. ఇంగ్లండ్ ప్రధాన బౌలర్ స్టువర్ట్ బ్రాడ్ వేసిన ఓవర్లో ఆరు బంతులకు ఆరు సిక్స్‌లు బాదేశాడు. బంతి వేయడమే ఆలస్యం అన్నట్లుగా వచ్చిన బంతిని వచ్చినట్లుగానే బౌండరీ లైన్ దాటించేశాడు. దీంతో కేవలం 12 బంతుల్లోనే హాఫ్ సెంచరీ సాధించాడు. అంతర్జాతీయ క్రికెట్‌లో ఓ ఫార్మాట్‌కైనా ఇదే ఫాసెస్ట్ హాఫ్ సెంచరీ కావడం మరో రికార్డు. ఈ ఒక్క ఓవర్‌తోనే యువరాజ్ టీ20 క్రికెట్ చరిత్రలో తనకంటూ ఓ ప్రత్యేక స్థానాన్ని సంపాదించుకున్నాడు. యువీ విధ్వంసంతో ఆ మ్యాచ్‌లో టీమిండియా 20 ఓవర్లకు 218 పరుగులు చేసి ఇంగ్లండ్‌ను 18 రన్స్ తేడాతో ఓడించింది. యువరాజ్ ఇచ్చిన స్ఫూర్తితోనే భారత్ వరుస విజయాలతో ఫైనల్‌కు చేరి అక్కడ చిరకాల ప్రత్యర్థి పాకిస్థాన్‌ను ఓడించి తొలి టీ20 ప్రపంచకప్ విజేతగా చరిత్రలో నిలిచిపోయింది.

Related Posts

0 comments on " పొట్టి ఫార్మేట్ లలో యూవీ రికార్డ్"

Leave A Comment