అంతర్ జిల్లాలకు పాస్ లు అవసరం లేదు
విజయవాడ, మే 23,
ఏపీ ప్రజలకు పోలీసులు గుడ్‌న్యూస్ చెప్పారు. రాష్ట్రంలోని ఒక జిల్లా నుంచి మరో జిల్లాకు వెళ్లాలంటే పాస్‌లు అవసరం లేదు. అంతర్ జిల్లాల్లో పాస్‌లు లేకుండా తిరగొచ్చంటోంది. శుక్రవారం నుంచి అనుమతి ఇచ్చినట్లు పోలీసులు ట్విట్టర్ ద్వారా తెలిపారు. ట్విట్టర్ వేదికగా ఏపీ ప్రజలు పోలీసులు తాము పొరుగు జిల్లాలకు వెళ్లాలని పెద్ద ఎత్తున అనుమతి కోసం ట్వీట్‌లు చేశారు. దీనిపై స్పందించిన పోలీసులు.. పొరుగు జిల్లాలకు వెళ్లాలంటే పాస్‌లు అవసరం లేదని తేల్చి చెప్పారు.పాస్‌లు లేకపోయినా కండిషన్స్ అప్లై అంటున్నారు పోలీసులు. కారుల్లో ముగ్గురికి మించకుండా ప్రయాణించవచ్చన్నారు. అలాగే... మాస్కులు ధరించడం, సోషల్ డిస్టాన్స్ పాటించడం వంటి నిబంధనలు తప్పనిసరిగా అమలవుతున్నాయని తెలిపారు. ప్రజలు ఇష్టం వచ్చినట్లు తిరగడానికి వీల్లేదని.. ఏదైనా అత్యవసరమైన పనులు ఉంటేనే వెళ్లాలని సూచిస్తున్నారు. ఎవరైనా నిబంధనలు ఉల్లంఘిస్తే చర్యలు తీసుకుంటామని హెచ్చరిస్తున్నారు. ఇక రెడ్, ఆరెంజ్ జోన్స్‌.. కంటైన్మెంట్ ప్రాంతాల్లో మాత్రం నిబంధనలు కొనసాగుతాయంటున్నారు. అంతేకాదు ఉదయం ఏడు గంటల నుంచి రాత్రి ఏడు గంటల వరకు మాత్రమే అనుమతి ఉంటుంది.. తర్వాత ఎవరైనా బయటకు వస్తే చర్యలు తప్పవు.పొరుగు రాష్ట్రాలకు వెళ్లాలన్నా.. ఏపీకి రావాలన్నా అనుమతి తప్పనిసరి. ముఖ్యమైన పనులు నిమిత్తం బయటకు వెళ్ళేవారికి మాత్రమే పాస్‌లు జారీ చేయనున్నారు. ఈ మేరకు పోలీస్ శాఖ పలు సూచనలు చేసింది. అత్యవసర వైద్య చికిత్స, కుటుంబంలో మరణం, సామాజిక పనులు, ప్రభుత్వ విధి నిర్వహణ తదితర అత్యవసర పనులపై ప్రయాణించాలనుకునే వారికి ఈ-పాస్‌లు జారీ చేయనున్నట్టు పోలీస్ శాఖ తెలిపింది.ఈ-పాస్‌ల కోసం వెబ్‌సైట్‌లో దరఖాస్తు చేసుకోవాల్సి ఉంటుంది. ఇందుకోసం సమర్పించిన వివరాలను పోలీసులు ఆమోదిస్తే దరఖాస్తు చేసుకున్న వారి మొబైల్, మెయిల్ ఐడీకి వాహన అత్యవసర పాస్‌ను పంపిస్తారు. పాస్‌ల కోసం దరఖాస్తు చేసుకోవాలంటే కొన్ని డాక్యుమెంట్లు తప్పనసిరి అని సూచించింది. ఈ ప్రొసెస్‌లో వెరిఫికేషన్ సమయంలో మొబైల్ నంబర్‌కు ఓ ఓటీపీ వస్తుంది. అప్లికేషన్ పెట్టె ముందు అవసరమైన ప్రాసెస్ ప్రారంభించాలి. దరఖాస్తు పూర్తి చేసిన తర్వాత ఓ రిసిప్ట్ వస్తుంది.. అన్ని డాక్యుమెంట్లు పక్కాగా ఉండి.. కారణాలు నిజమైతే ఆ తర్వాత మీకు ఈసారి రూట్ పాస్ లభిస్తుంది.
పాస్ కావాల్సిన డాక్యుమెంట్లు
1) పాస్‌పోర్ట్ సైజ్ ఫోటో
2) ప్రయాణించేవారి వివరాలు
3) ప్రయాణించే వారి ఐడీ ప్రూఫ్స్
4) మెయిల్ ఐడీ
5) అవసరమైన సంబంధిత డాక్యుమెంట్లు
6) మొబైల్ నంబర్
7) వాహనానికి సంబంధించిన వివరాలు