హార్ట్ అటాక్ లో కపిల్, ముంబై, 
భారత క్రికెట్ మాజీ కెప్టెన్ కపిల్ దేవ్‌ (61)కు హార్ట్ ఎటాక్ వచ్చింది. దీంతో ఢిల్లీలోని ఓ హాస్పిటల్‌లో ఆయన యాంజియోప్లాస్టీ సర్జరీ చేయించుకున్నారు. బుధవారం అర్ధరాత్రి దాటిన తర్వాత ఒంటి గంట సమయంలో కపిల్‌ ఛాతి నొప్పితో తమ హాస్పిటల్‌కు వచ్చారని ఫోర్టిస్ ఎస్కార్ట్స్ హార్ట్ ఇన్‌స్టిట్యూట్ తెలిపింది. సమస్యను వెంటనే గుర్తించి అర్ధరాత్రి సమయంలో ఎమర్జెన్సీ కరోనరీ యాంజియోప్లాస్టీ నిర్వహించామని ఢిల్లీ ఓఖ్లాలోని ఫోర్టిస్ హాస్పిటల్ వర్గాలు వెల్లడించాయి.1983లో టీమిండియాకు వరల్డ్ కప్ అందించిన కపిల్.. క్రికెట్లోని అత్యుత్తమ ఆల్‌రౌండర్లలో ఒకడిగా గుర్తింపు తెచ్చుకున్నారు. స్టార్లతో నిండిన వెస్టిండీస్ జట్టును వరల్డ్ కప్ ఫైనల్లో కపిల్ నాయకత్వంలోని భారత జట్టు ఓడించడం అప్పట్లో పెద్ద సంచలనం. కపిల్ స్ఫూర్తితో ఎంతో మంది క్రికెట్ ఆడటానికి ఆసక్తి చూపారు.16 ఏళ్లపాటు క్రికెటర్‌గా సేవలు అందించిన కపిల్ దేవ్.. 131 టెస్టులు, 225 వన్డేలు ఆడారు. ఇమ్రాన్ ఖాన్, ఇయాన్ భోథమ్, రిచర్డ్ హ్యాడ్లీ లాంటి దిగ్గజాలు కపిల్ సమకాలీకులు. కపిల్‌కు హార్ట్ ఎటాక్ వచ్చిన విషయాన్ని ఎకనమిక్స్ టైమ్స్ జర్నలిస్ట్ టీనా థాకర్ ట్విట్టర్ ద్వారా వెల్లడించారు.కొద్ది రోజుల క్రితం ఢిల్లీ గోల్ఫ్ క్లబ్‌లో కపిల్ దేవ్ ఆడుతుండగా చూశానని గతంలో దౌత్యవేత్తగా పని చేసిన క్రిషన్ చందర్ సింగ్ తెలిపారు. కపిల్ చాలా బరువు తగ్గారన్నారు. ఒంటి మీద కండ లేకుండా బాగా చిక్కిపోయారన్నారు. డయాబెటిస్ సంబంధ ఆరోగ్య సమస్యలు ఉన్నాయని కపిల్ తనకు చెప్పారన్నారు. కపిల్ దేవ్ త్వరగా కోలుకోవాలని ఆయన ప్రార్థించారు..