హైదరాబాద్, ఫిబ్రవరి 4, 
జీహెచ్ఎంసీ ఎన్నికలు ముగిశాయి. అయితే ఇంతవరకు కార్పొరేటర్లు ఎవరూ ప్రమాణ స్వీకారం చేయలేదు. అయితే తాజాగా జీహెచ్ఎంసీ కౌన్సిల్ సమావేశానికి కౌంట్ డౌన్ మొదలైంది. జీహెచ్ఎంసీ కొత్త పాలక మండలి ప్రమాణస్వీకారానికి సమయం సమీపిస్తోంది. ఫిబ్రవరి 11న కొత్తగా ఎన్నికైన కార్పొరేటర్లతో ప్రమాణస్వీకార కార్యక్రమం జరగబోతోంది. అదే రోజు మేయర్, డిప్యూటీ మేయర్ ఎన్నిక కోసం కూడా జీహెచ్ఎంసీ ఏర్పాట్లు చేస్తోంది. దీంతో టీఆర్ఎస్ కార్పొరేటర్లలో మేయర్, డిప్యూటీ మేయర్‌ కుర్చీల కోసం రేసు ఊపందుకుంది. మేయర్ సీటును ఈసారి జనరల్ మహిళకు కేటాయించారు.అయితే ఈ క్రమంలో పలువురు పేర్లు ప్రముఖంగా మహిళా మేయర్ రేసులో వినిపిస్తున్నాయి. జీహెచ్ఎంసీ ఫలితాలు రాగానే మేయర్ రేసులో భారతీనగర్ కార్పొరేటర్ సింధూ ఆదర్శరెడ్డి పేరు వినిపించింది. ప్రస్తుతం ఆమె మేయర్ రేస్ నుంచి వెనక్కి తగ్గినట్లు ప్రచారం జరుగుతోంది. ఖైరతాబాద్ కార్పొరేటర్ విజయారెడ్డి మేయర్ కాబోతున్నారని సోషల్ మీడియాలో ఆమె అనుచరులు విపరీతంగా ప్రచారం చేస్తున్నారు. ఆమె కోసం ఖైరతాబాద్ ఎమ్మెల్యే దానం నాగేందర్ అధిష్టానంతో రాయబారం నడుపుతున్నట్లు ప్రచారం. కేకే కుమార్తె గద్వాల్ విజయలక్ష్మి తన తండ్రి కేశవరావు ద్వారా మేయర్ సీటు కోసం ప్రయత్నాలు చేస్తున్నారు.బంజారాహిల్స్ కార్పొరేటర్ మన్నె కవితారెడ్డి ఇటీవల కేటీఆర్‌ను కలిశారు. మేయర్‌గా తనకు అవకాశం ఇవ్వాలని కోరినట్లు ప్రచారం జరుగుతోంది. ఎవరికి తోచిన రీతిలో వారు మేయర్ కుర్చీకోసం ప్రయత్నాలు చేస్తున్నారు. దీంతో మేయర్ పదవి ఎవరిని వరిస్తుందోనన్న సస్పెన్స్ నెలకొంది. అటు డిప్యూటీ మేయర్ పదవి కోసం పలువురు ఆశవహులు ప్రయత్నాలు చేస్తున్నారు. ప్రస్తుత డిప్యూటీ మేయర్ బాబాను మళ్లీ కొనసాగిస్తారనే ప్రచారం జరుగుతోంది.
కొత్తగా డిప్యూటీ మేయర్ కోసం పలువురు పావులు కదుపుతున్నారు. దీంతో మరికొందరి పేర్లు కూడా వినిపిస్తున్నాయి. అల్లాపూర్ కార్పొరేటర్‌గా గెలిచిన సహిబా బేగం మైనారిటీ కోటాలో తనకు అవకాశం ఇవ్వాలని కోరుతున్నారు. కూకట్‌పల్లి ఎమ్మెల్యే మాధవరం కృష్ణారావుతో పైరవీ చేయిస్తున్నట్లు ప్రచారం జరుగుతోంది. హోంమంత్రి మహ్మాద్ అలీతోపాటు మరికొందరు మైనారిటీ నేతలతో సంప్రదింపులు జరుపుతున్నట్లు సమాచారం. అధిస్థానం కూడా సహిబాకు అవకాశం ఇచ్చేలా ఉందని జీహెచ్ఎంసీ వర్గాలు చెబుతున్నాయి. మొత్తం మీద మరో వారం రోజుల్లో జీహెచ్ఎంసీ మేయర్ ఎవరు?అన్న సస్పెన్స్‌కు తెరపడనుంది.