విజయవాడ, జూన్ 8, 
జయవాడలో లేడీ కిలాడీల మోసాలకు అడ్డూఅదుపు లేకుండా పోతోంది. మాటల గారడితో ఒకరు కోట్లు కొల్లగొడితే, వలపు వలతో మరొకరు లక్షలు దోచేశారు. ఉద్యోగాల పేరుతో ఒకరు బురిడీ కొట్టిస్తే, పెళ్లి పేరుతో మరొకరు అమాయకుడి నుంచి ఉన్నదంతా ఊడ్చేసింది. పాపం పండటంతో ఇద్దరూ ఇప్పుడు కటకటాలపాలై ఊచలు లెక్కలు పెడుతున్నారు. న్యాయస్థానాల్లో, ప్రభుత్వ శాఖల్లో ఉద్యోగాలు ఇప్పిస్తానంటూ లక్షల రూపాయలు దండుకొని కుచ్చుటోపీ పెట్టిన కొప్పుల రమాదేవి ఉదంతం మరిచి పోకముందే విజయవాడలో మరో మాయలేడి మోసం బయటపడింది.
స్నేహం పేరుతో ముగ్గులోకి దింపి నయవంచన చేయడం రమాదేవి నైజమైతే, తన అందాన్ని ఎరగా వేసి పెట్టి యువకులని బుట్టలో వేసుకోవటంలో శ్రీదివ్య ఆరితేరిపోయింది. పెళ్ళై ఇద్దరు బిడ్డలకు తల్లయిన శ్రీదివ్య సులభంగా డబ్బు సంపాదించాలన్న ఉద్దేశంతో అక్రమార్గాల వైపు అడుగులు వేసింది. భర్త రజాక్‌తో కలిసి తన పథకాలు అమలు చేసేది. ఈ నేపథ్యంలోనే విజయవాడ ఎన్టీఆర్ కాంప్లెక్స్‌లో సెల్‌ఫోన్ దుకాణం నిర్వహించే కృష్ణపై ఆమె కన్ను పడింది. సెల్‌ఫోన్ రిపేరు పేరుతో ఒకట్రెండు సార్లు దుకాణానికి వెళ్లి శ్రీదివ్య తన అందంతో అతడిని ట్రాప్‌లోకి లాగింది. ప్రేమ పేరుతో నాటకమాడి పెళ్లి వరకు తీసుకెళ్లింది. ఆ తర్వాత తన పేరిట ఉన్న పొలాన్ని అమ్ముదామంటే తక్కువ రేటుకు అడుతున్నారని, అవసరానికి డబ్బు సర్దుబాటు చేస్తే పొలాన్ని కృష్ణ పేరిట రాస్తానని నమ్మించింది. ఆమె మాటలు నమ్మిన కృష్ణ బ్యాంక్‌ లోన్ తీసుకుని రూ.50లక్షలు అకౌంట్‌కి ట్రాన్స్‌ఫర్ చేసి, మరో రూ.30లక్షలు క్యాష్ ఇచ్చాడు. డబ్బు తీసుకున్న తర్వాత శ్రీదివ్య కనిపించకుండా పోయింది. ఫోన్ కూడా స్విచ్ఛాఫ్ రావడంతో కృష్ణకి ఏం చేయాలో తోచలేదు. కొద్దిరోజుల తర్వాత కంటపడిన శ్రీదివ్యను నిలదీయగా.. తనను ఎవరో ఓ గదిలో బంధించి సెల్‌ఫోన్ లాక్కున్నారని కట్టుకథలు చెప్పింది. ఆమె మాటలపై అనుమానం వచ్చిన కృష్ణ ఆరా తీయగా దిమ్మతిరిగే నిజాలు వెలుగుచూశాయి. ఆమె తనలాగే చాలామందిని మోసం చేసిందని తెలుసుకుని షాకయ్యాడు. దీంతో తనను అప్పులపాలు చేసిన శ్రీదివ్యపై చర్యలు తీసుకోవాలని పోలీసులకు ఫిర్యాదు చేశాడు. విచారణలో పోలీసులకు మరిన్ని షాకింగ్ విషయాలు తెలిశాయి. శ్రీదివ్య ఇప్పటివరకు నాలుగు పెళ్లిళ్లు చేసుకుందని, తన అందంతో అనేక మందికి వలేసి కోట్లాది రూపాయలు దండుకుందని తేల్చిన పోలీసులు ఆమెపై కేసు నమోదు చేశారు. ఆమెకు సహకరిస్తున్న మొదటి భర్త రజాక్, సోదరుడు పోతురాజుతో పాటు చలం అనే మరో వ్యక్తి కదలికలపై ఆరా తీస్తున్నారు. విచారణలో శ్రీదివ్య గురించి ఇంకెన్నో షాకింగ్ విషయాలు బయటపడతాయోనని అందరూ ఆసక్తిగా గమనిస్తున్నారు. ఆమె చేతిలో మోసపోయిన వారెవరైనా ఉంటే తమను సంప్రదించాలని విజయవాడ పోలీసులు సూచిస్తున్నారు.