టిక్ టాక్ స్టార్ కు రోడ్డు పైనే ముద్దు
ఇస్లామాబాద్, ఆగస్టు 21,
పాకిస్థాన్‌ స్వాతంత్ర దినోత్సవం రోజున టిక్‌టాక్ వీడియోలు చేసుకుంటున్న యువతిపై వందలాది మంది దాడికి పాల్పడి, బట్టలు చింపి గాల్లోకి ఎగరేసిన ఓ వీడియో వెలుగులోకి వచ్చిన విషయం తెలిసిందే. అదే రోజున మరో యువతిపై లైంగిక వేధింపులకు పాల్పడిన వీడియో తాజాగా బయటకు వచ్చింది. పాకిస్థాన్‌లో మహిళలపై పెరుగుతున్న దాడుల నేపథ్యంలో భద్రత కోసం భయపడే పరిస్థితికి ఈ ఘటన అద్దం పడుతోంది.రద్దీగా ఉండే రహదారిపై ఓపెన్ రిక్షాలో ఇద్దరు మహిళలు ప్రయాణిస్తుండగా.. ఓ వాహనంపై వెళ్తున్న యువకుడు అమాంతం రిక్షాలోకి ఎక్కి ఓ యువతిని బలవంతంగా ముద్దుపెట్టుకున్నాడు. ఆ ఇద్దరు మహిళల మధ్యలో ఓ చిన్నారి కూడా ఉంది. ఈ హఠాత్పరిణామానికి ఆ మహిళలు ఇద్దరూ బిత్తరపోయారు. దీనికి ముందు మహిళలు వెళుతున్న రిక్షాను కొందరు యువకులు బైక్‌‌తో వెంబడించి, టీజ్ చేశారు. కామెంట్స్ చేస్తూ వెంటబడటంతో బాధితులు కలవరపడ్డారు.ఇదే సమయంలో ఓ యువకుడు వారి రిక్షాలోకి దూకి బలవంతంగా ఆ మహిళను ముద్దు పెట్టుకున్నాడు. దీనికి షాక్ తిన్న ఆమె వెంటనే తేరుకుని పెద్దగా కేకలు వేసినా ఎవరూ పట్టించుకోలేదు. మహిళల్లో ఒకరు తన కాలికి ఉన్న చెప్పు తీసి కామాంధుడ్ని కొట్టేందుకు సిద్ధమయ్యింది. వేధింపులకు గురైన మహిళ తీవ్ర మనస్తాపంతో రిక్షా దిగిపోవడానికి ప్రయత్నించగా.. పక్కనే ఉన్న ఆమె వారించింది.జాతీయ జెండాను ఎగురవేస్తూ కార్లు, బైక్‌లు ఆ రిక్షాను చుట్టుముట్టి ఉండటాన్ని బట్టి లాహోర్‌లో పాక్ స్వాతంత్రదినోత్సవం రోజునే జరిగినట్టు తెలుస్తోంది. ప్రస్తుతం ఈ వీడియో సోషల్ మీడియాలో వైరల్ కావడంతో.. నెటిజన్లు తీవ్ర ఆగ్రహం వ్యక్తం చేస్తున్నారు. మహిళలను లైంగిక వేధింపులకు గురిచేసేవారిపై కఠిన చర్యలు తీసుకోవాలని డిమాండ్ చేస్తున్నారు.‘నిన్న రాత్రి విద్వేషాన్ని చిమ్మిన పురుషులు, మహిళలు అందరూ ఎక్కడ ఉన్నారు ?? ఇందులో టిక్‌టాకర్ల కూడా ఉన్నారా? అలాంటి ప్రవర్తనను ఎందుకు స్వాగతిస్తున్నారు? దేశంలో మహిళలు సురక్షితంగా ఉన్నారా? వారి గోడును ఎవరైనా వింటున్నారా? అని ఓ నెటిజన్ మండిపడ్డారు.