విజయవాడ మే 13,
తెలుగు దేశం పార్టీ అధినేత, ప్రతిపక్ష నాయకుడు నారా చంద్రబాబునాయుడు ఇక ముఖ్యమంత్రి అయ్యే ప్రసక్తే లేదని నెల్లూరు సిటీ వైఎస్సార్ కాంగ్రెస్ పార్టీ ఎమ్మెల్యే, ఏపీ మాజీ మంత్రి అనిల్ కుమార్ వ్యాఖ్యానించారు. ‘గడప గడపకు మన ప్రభుత్వం’ కార్యక్రమంలో భాగంగా నెల్లూరు నగరం వెంకటేశ్వరపురంలో అనిల్ కుమార్ యాదవ్ పర్యటించారు.ఈ సందర్భంగా అనిల్ యాదవ్ మాట్లాడుతూ.. ముఖ్యమంత్రి వైఎస్ జగన్మోహన్ రెడ్డిని నేరుగా ఎదుర్కోలేక చంద్రబాబు, జనసేన అధినేత పవన్ కళ్యాణ్‌లు కలిసి పొత్తుల గురించి మాట్లాడుతున్నారని మండిపడ్డారు. పవన్ కళ్యాణ్, చంద్రబాబు పొత్తులు పెట్టుకుంటారో.. కలిసుంటారో.. పెళ్లి చేసుకుంటారో తమకు అనవసరం అని సెటైర్లు వేశారు. ఎవరు, ఎవరితో పొత్తులు పెట్టుకున్నా తమకు అభ్యంతరం లేదని స్పష్టం చేశారు. అయితే చంద్రబాబు, పవన్ కళ్యాణ్‌లకు వారి మీద వారికే నమ్మకం లేదని సెటైర్లు వేశారు.ప్రతిపక్ష నాయకులంతా పొత్తుల గురించి మాట్లాడుతున్నారంటే సీఎం జగన్ ఎంత బలవంతుడో అర్థం అవుతోందని అనిల్ యాదవ్ అన్నారు. జగన్ అంటే భయపడుతున్నారని అందరికీ అర్థమవుతోందన్నారు. జగన్మోహన్ రెడ్డి అమలు చేస్తున్న సంక్షేమ పథకాలతో విపక్షాలకు భయం పట్టుకుందని తెలిపారు. అందుకే, ఎపుడో జరిగిన ఘటనలను ఇప్పుడు వైరల్ చేస్తూ కొన్ని ఛానళ్లు ఆనందం పొందుతున్నాయని ఆగ్రహం వ్యక్తం చేశారు. సంక్షేమ పథకాల అమలుతో ప్రజల మనసుల్లో సీఎం జగన్ నిలిచిపోయారని.. ఎంత మంది కలిసి వచ్చినా వైసీపీకి ఎలాంటి నష్టం లేదని స్పష్టం చేశారు.