దంతేవాడ
ఛత్తీస్గఢ్ లోని దంతేవాడలో శనివారం ఉదయం మావోయిస్టులు ఐఈడీ బాంబును పోలీసులే లక్ష్యంగా పేల్చారు. ఘటనలో ఇద్దరు సిఆర్పిఎఫ్ జవాన్లకు, మరోక వ్యక్తికి గాయాలయ్యాయి. గత ఏడాది ప్రాణాలు కోల్పోయిన 54 మంది నక్సలైట్ల జ్ఞాపకార్థం శనివారం నుంచి డిసెంబర్ 8 వరకు పీఎల్జీఏ వారోత్సవాలు జరుపుకుంటున్న విషయం తెలిసిందే. ఈ నేపధ్యంలో మావోయిస్టులు కరపత్రాలను విడుదల చేశారు. కొన్ని చోట్ల పోస్టర్లను అంటించారు. అప్రమత్తమైన జవాన్లు శనివారం ఉదయం పీఎల్జీఏ వారోత్సవాలకు సంబంధిచిన పోస్టర్లను ఆ ప్రాంతం నుండి తొలగించే సమయంలో జవాన్లు టార్గెట్ గా ఐఈడీ పేలుడుకు పాల్పడ్డారు. ఈ పేలుడులో సీఆర్పీఎఫ్ 195 బెటాలియన్కు చెందిన ఇద్దరు జవాన్లకు, అలానే ఒక మీడియా వ్యక్తికి గాయాలయ్యాయి. కాగా గాయపడిన సీఆర్పీఎఫ్ జవాన్లను చికిత్స నిమిత్తం సమీప ఆరోగ్య కేంద్రానికి తరలించారు. జవాన్ల పరిస్థితి విషమంగా ఉన్నట్లు సమాచారం..