.jpg)
వెబ్ బాట పట్టిన హన్సిక
చెన్నై, నవంబర్ 14,
సౌత్‌ నార్త్‌ అన్న తేడా లేకుండా అన్ని ఇండస్ట్రీలలో ప్రస్తుతం వెబ్ సిరీస్‌ల హవా కనిపిస్తోంది. అనుకున్న కథను వీలైనంత బడ్జెట్‌లో రూపొందించేందుకు వెబ్ సిరీస్‌లు సరైన వేదికగా భావిస్తున్నారు దర్శక నిర్మాతలు. అంతే కాకుండా కాస్త ఘాటైన కంటెంట్‌ను సెన్సార్‌ ఇబ్బందులు లేకుండా రిలీజ్ చేసేందుకు కూడా వెబ్ సరైన వేదికగా భావిస్తున్నారు. డిజిటల్‌ రంగం అభివృద్ధి చెందుతుండటంతో స్టార్ హీరోలు హీరోయిన్లుగా కూడా ఈ రంగం మీద దృష్టి పెడుతున్నారు. తెలుగులో రానా, జగపతి బాబు, నవదీప్‌, అడివి శేష్‌ లాంటి స్టార్స్‌ ఇప్పటికే డిజిటల్‌ రంగంలోకి అడుగు పెట్టారు. హీరోయిన్లు కూడా బుల్లి తెర మీద తమ హవా చూపిస్తున్నారు. ముఖ్యంగా కియారా అద్వానీ, రాధికా ఆప్టేలు చేసి వెబ్ సిరీస్‌లు హాట్ టాపిక్‌గా మారాయి.ఈ ఇద్దరు భామలు డిజిటల్‌ ప్లాట్‌ఫాంలో కాస్త హద్దులు దాటి నటించారు. ఘాటు సన్నివేశాలతో పాటు స్కిన్‌ షోతోనూ అలరించారు. తాజాగా ఈ లిస్ట్‌లో చేరేందుకు మరో బ్యూటీ రెడీ అవుతోంది. తమిళనాట వరుస అవకాశాలతో దూసుకుపోతున్న హన్సిక ఓ వెబ్ సిరీస్‌లో అలరించేందుకు రెడీ అవుతోంది.పిల్ల జమిందార్‌, భాగమతి చిత్రాల దర్శకుడు అశోక్‌ తెరకెక్కిస్తున్న ఈ వెబ్ సిరీస్ చిత్రీకరణ దాదాపుగా పూర్తయ్యింది. ఈ సిరీస్‌లో హన్సిక కాస్త ఘాటైన సన్నివేశాల్లో నటించినట్టుగా తెలుస్తోంది. డిజిటల్‌ ప్లాట్‌ఫాంలో షో సక్సెస్‌ అవ్వాలంటే కాస్త స్పైసీ కంటెంట్‌ అవసరం అందుకు తగ్గట్టుగా ఈ వెబ్ సిరీస్‌ను డిజైన్‌ చేశారట. అయితే సిరీస్ ఏ ప్లాట్‌ ఫాంలో రిలీజ్ అవుతుందన్న విషయంపై మాత్రం ఇంకా క్లారిటీ రాలేదు.ఇక ఈ భామ చాలా కాలం తరువాత తెలుగులో నటించిన తెనాలి రామకృష్ణ బీఏబీఎల్‌ ఈ శుక్రవారం ప్రేక్షకుల ముందుకు రానుంది. సందీప్ కిషన్‌ హీరోగా తెరకెక్కిన ఈ కామెడీ ఎంటర్‌టైనర్‌కు జీ నాగేశ్వర్‌ రెడ్డి దర్శకుడు.