ఓజా రిటైర్మెంట్...
ముంబై,ఫిబ్రవరి 24
భారత క్రికెటర్ ప్ర‌జ్ఞాన్ ఓజా సోషల్ మీడియా వేదికగా శుక్రవారం రిటైర్మెంట్ ప్రకటించిన సంగతి తెలిసిందే. అంతర్జాతీయ క్రికెట్‌తోపాటు ఫ‌స్ట్‌క్లాస్ కెరీర్‌కు కూడా త‌ను గుడ్ బై చెప్పాడు.ఒక‌ప్ప‌టి త‌న స‌హ‌చరుడు, మాజీ క్రికెట‌ర్ ప్ర‌జ్ఞాన్ ఓజా తాజాగా రిటైర్మెంట్ ప్ర‌క‌టించ‌డంపై భార‌త లిమిటెడ్ ఓవ‌ర్ల వైస్ కెప్టెన్ రోహిత్ శ‌ర్మ ఎమోష‌న‌ల్ అయ్యాడు. సోష‌ల్ మీడియా వేదికగా ఓజా రిటైర్మెంట్‌పై స్పందించాడు. మ‌రోవైపు రిటైర్మెంట్ అనంత‌రం ఓజా జీవితం సాఫీగా సాగాల‌ని దిగ్గ‌జ క్రికెట‌ర్ స‌చిన్ టెండూల్క‌ర్ స‌హా మ‌రికొంత మంది క్రికెట‌ర్లు ఆకాంక్షించారు. అలాగే సోష‌ల్ మీడియాలో ఓజా బౌలింగ్‌ను గుర్తు తెచ్చుకుని కొంత‌మంది నెటిజ‌న్లు పోస్టులు పెడుతున్నారు.తాజాగా ప్ర‌జ్ఞాన్‌ను ముద్దుగా ఓజి అని పేర్కొన్న‌ రోహిత్ ఏమ‌ని స్పందించాడంటే.. టీమిండియాతోపాటు ఐపీఎల్‌లోనూ ఓజాతో అనేక మ‌ధుర జ్ఞాప‌కాల‌ను పంచుకున్నానని తెలిపాడు. క్రికెట్ ప‌రిధిని దాటి త‌మ‌ స్నేహం విస్త‌రించిందని, రిటైర్మెంట్ త‌ర్వాత ఓజా జీవితం సాఫీగా  సాగాలని కోరుకున్నాడు. తన అనుభ‌వాన్ని రాబోయే త‌రాల‌కు అందించాల‌ని రోహిత్ ట్వీట్ చేశాడు.మరోవైపు ఓజా రిటైర్మెంట్‌పై స‌చిన్ స్పందిస్తూ.. త‌న వీడ్కోలు టెస్టు (2013)లో ప‌ది వికెట్లు తీసి ఆ మ్యాచ్‌ను మ‌ధురంగా ఓజా మ‌ల‌చాడ‌ని గుర్తు తెచ్చుకున్నాడు. 2008లో టీమిండియాలో అరంగేట్రం చేసిన ఓజా.. 2013లో భార‌త్ త‌ర‌పున చివ‌రి మ్యాచ్ ఆడాడు. త‌న కెరీర్‌లో 24 టెస్టులు, 18 వ‌న్డేలు, 6 టీ20లు ఆడాడు. ఇక రోహిత్‌తో ఐపీఎల్లో డెక్క‌న్ చార్జ‌ర్స్ (ఇప్పుడు ఉనికిలో లేదు), ముంబై ఇండియ‌న్స్ త‌ర‌పున ఓజా ఆడాడు