శంషాబాద్ ఎయిర్ పోర్ట్ మూసివేత
హైద్రాబాద్, మార్చి 26
రోజూ జాతీయ, అంతర్జాతీయ ప్రయాణికుల రద్దీతో కళకళలాడుతుండే శంషాబాద్ అంతర్జాతీయ విమానాశ్రయం కళ తప్పింది. దేశ వ్యాప్త లాక్‌డౌన్ ప్రభావంతో సర్వీసులన్నీ నిలిచి పోవడంతో విమానాశ్రయాన్ని మూసివేశారు. కేవలం సరకు రవాణా విమానాలకు మాత్రమే ప్రస్తుతం అనుమతి ఉంది. అయితే శంషాబాద్‌ అంతర్జాతీయ విమానాశ్రయం నుంచి ఇలా సర్వీసులన్నీ నిలిచిపోవడం ఇదే తొలిసారి కావడం విశేషం. విద్యుత్తు దీపాల్లో మిరుమిట్లు గొలుపుతూ ఉండే ఎయిర్‌పోర్టు ప్రాంగణంలో విమాన సర్వీసులు రద్దులు కావడంతో చీకట్లు అలుముకున్నాయి.వాహన పార్కింగ్ ప్రాంతం, డిపాశ్చర్, అరైవల్ టెర్మినళ్లు పూర్తిగా మూతపడ్డాయి. లైట్లన్నింటినీ ఆపేయడంతో పూర్తిగా చీకటి వాతావరణం నెలకొంది. 2008లో శంషాబాద్ ఎయిర్‌పోర్టు ప్రారంభమైన నాటి నుంచి ఇలాంటి పరిస్థితి ఎప్పుడు ఎదురుకాలేదు. అంతకుముందు బేగంపేట విమానాశ్రయానికి కూడా ప్రస్తుత గడ్డు పరిస్థితి ఎన్నడూ ఎదురుకాలేదు. కరోనా వైరస్ మహమ్మారిని అరికట్టేందుకు కేంద్రం ముందస్తుగా తీసుకున్న చర్యల్లో భాగంగా దేశవ్యాప్తంగా ఈ నెల 22న అర్ధరాత్రి నుంచి అంతర్జాతీయ విమాన సర్వీసులను కేంద్రం పూర్తిగా రద్దు చేసిన సంగతి తెలిసిందే. అయినా, కరోనా రోగుల సంఖ్య క్రమంగా పెరుగుతుండడంతో మంగళవారం అర్ధరాత్రి నుంచి పూర్తిగా దేశీయ విమాన సర్వీసులను కూడా రద్దు చేసింది. కేవలం సరకు రవాణా విమానాలకు మాత్రమే అనుమతి ఇచ్చింది.