తెలంగాణ నిరుద్యోగులకు శుభవార్త చెప్పారు మంత్రి హరీశ్ రావు. తెలంగాణ వచ్చాక లక్షా 30వేల ఉద్యోగాలు భర్తి చేశామన్నారు. రానున్న రోజుల్లో మరో 50 వేల ఉద్యోగాలు భర్తీ చేయనున్నామని ఆర్థికశాఖ మంత్రి హరీశ్ రావు చెప్పారు. సోమవారం సిద్ధిపేట జిల్లా కేంద్రంలో మోడల్ జిల్లా గ్రంథాలయ భవనాన్ని హరీశ్ రావు ప్రారంభించారు. ఈ సందర్భంగా ఆయన మాట్లాడుతూ పుట్టింది మొదలు మరణించే వరకు మనిషి నిరంతర విద్యార్థి అని అన్నారు. నేషనల్ లెవల్‌లో పోటీ పరీక్షలకు ప్రిపేర్ అయ్యే అభ్యర్థులకు ఈ మోడల్ జిల్లా గ్రంథాలయం బాగా ఉపకరిస్తుందన్నారు.డిజిటల్ లైబ్రరీలో మొత్తం 13 కంప్యూటర్లు ఉన్నాయని, ఉచిత ఇంటర్నెట్‌తో వీటిని సద్వినియోగం చేసుకోవాలన్నారు. దీనిని నేషనల్ డిజిటల్ లైబ్రరీకి లింక్ చేశామని చెప్పారు.అన్ని రకాల బుక్స్, లైవ్ విజువల్స్, ఇంటర్ నేషనల్ జర్నల్స్ అందుబాటులో ఉంటాయన్నారు. తెలంగాణా వచ్చాక 1.30 లక్షల ఉద్యోగాలు భర్తి చేశామని, రానున్న రోజుల్లో మరో 50 వేల ఉద్యోగాలు భర్తీ చేయనున్నామని హరీశ్‌రావు అన్నారు. విజ్ఞానం మనిషికి తరగని నిధి.. ఎంత విజ్ఞానం సంపాదిస్తే అంతగా మనిషి ఎదుగుదల ఉంటుందన్నారు. విద్యార్థులు తమకు కావాల్సిన పుస్తకాలు ఏంటో సజేషన్ ఇస్తే వాటిని కచ్చితంగా అందుబాటులోకి తీసుకొస్తామన్నారు.