ప్రారంభమైన దళిత సర్వే
కరీంనగర్, ఆగస్టు 27,
ముఖ్యమంత్రి కేసీఆర్ కలల పథకమైన ‘దళిత బంధు’కు హుజురాబాద్‌‌ నియోజకవర్గాన్ని పైలెట్ ప్రాజెక్టుగా ఎంపిక చేసిన సంగతి తెలిసిందే. ఈ నేపథ్యంలోనే హుజురాబాద్‎లో శుక్రవారం అధికారులు సర్వే ప్రారంభించారు. ఇందుకు సంబంధించిన గైడ్ లైన్స్‎ను జిల్లా కలెక్టర్ కర్ణన్ అధికారులకు అందజేశారు.హుజురాబాద్ నియోజకవర్గంలోని ఐదు మండలాల్లో 200 మంది వివిధ శాఖల ఉద్యోగులు ఈ సర్వేలో పాల్గొంటున్నారు.ఈ సందదర్భంగా మొత్తం 48 అంశాలపై దళిత కుటుంబాల నుంచి వివరాలు సేకరించాల్సి ఉంది. ఐదు రోజుల్లో ఈ సర్వే పూర్తి చేయాలని జిల్లా యంత్రాంగం లక్ష్యంగా పెట్టుకుంది. ఈ సందర్భంగా హుజురాబాద్ ఆర్డీఓ రవీందర్ రెడ్డి మీడియాతో మాట్లాడుతూ.. దళిత బంధు సర్వేలో రెవెన్యూ అధికారులకు తోడుగా బ్యాంకు అధికారులు కూడా పాల్గొంటారని తెలిపారు. దళితుల సర్వే ద్వారా వివరించే అంశాలను పరిగణలోకి తీసుకొని వారికి ఏ పథకం వర్తిస్తుంది, వాటి వల్ల కుటుంబాలకు కలిగే ఆదాయం తదితర వివరాలను కూడా తెలియజేస్తామని పేర్కొన్నారు.