హైదరాబాద్ మార్చ్ 24
ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డికి నాంపల్లి ప్రజాప్రతినిధుల కోర్టు షాకిచ్చింది. గురవారం ఉదయం జగన్‌కు కోర్టు సమన్లు జారీ చేసింది. 2014 హుజూర్‌నగర్ ఎన్నికల్లో కోడ్ ఉల్లఘించారని ఆయనపై కేసు నమోదయ్యింది. అయితే ఈ కేసు విషయమై సోమవారం నాడు కోర్టుకు హాజరుకావాలని జగన్‌కు సమన్లు జారీ చేయడం జరిగింది. ఈ సమన్ల గురించి ఇంతవరకూ ప్రభుత్వం కానీ.. వైసీపీ నేతలు కానీ ఎవరూ రియాక్టవ్వలేదు. ఇందుకు సంబంధించి మరింత సమాచారం తెలియాల్సి ఉంది. కాగా ఈ కేసు 2014 సార్వత్రిక ఎన్నికల సమయంలో నమోదైంది. ఈ ఎన్నికల్లో హుజూర్‌నగర్ నుంచి వైసీపీ తమ పార్టీ అభ్యర్థిని నిలబెట్టింది. అయితే.. ఎన్నికల నియమావళిని పాటించలేదు. అంతేకాదు.. కాంపిటెంట్ అథారిటీ అనుమతి లేకుండానే రోడ్ షో నిర్వహించడంతో అప్పటి ఉమ్మడి నల్గొండ జిల్లా పోలీసులు.. జగన్‌తో పాటు ఆ పార్టీ సభ్యులైన జి నాగిరెడ్డి, జి శ్రీకాంత్‌పై కేసులు నమోదు చేశారు. ఐపీసీ సెక్షన్-188, 143 కింద అప్పట్లోనే పోలీసులు సమన్లు కూడా జారీ చేశారు. అయితే 2014 నాటి ఈ కేసులో ఎమ్మెల్యే, ఎంపీ కేసుల ప్రత్యేక సెషన్స్ కోర్టు తాజాగా సమన్లు జారీ చేసింది. కాగా.. ముఖ్యమంత్రి స్థాయిలో ఉండే వ్యక్తులకు సమన్లు జారీ చేయడం ఇదే తొలిసారని తెలుస్తోంది. ఈ సమన్లకు సంబంధించి మరింత సమాచారం తెలియాల్సి ఉంది. ఎన్నికల కోడ్ ఉల్లంఘన విషయంలో జగన్ తల్లి విజయమ్మ, సోదరి షర్మిల పైన కూడా కేసులు నమోదయ్యాయి. ఇదే నాంపల్లి కోర్టుకే పలుమార్లు ఇద్దరూ హాజరైన విషయం తెలిసిందే.