న్యూఢిల్లీ, మే 24
డిజీలాకర్‌లో దాచుకొన్న డిజిటల్‌ పాన్‌కార్డు, డ్రైవింగ్‌ లైసెన్సు, వాహన రిజిస్ట్రేషన్‌ సర్టిఫికెట్‌ లాంటి డాక్యుమెంట్లను ఇక నుంచి వాట్సాప్‌లో కూడా పొందవచ్చు. ఇందుకోసం వాట్సాప్‌లో మైగవ్‌ హెల్ప్‌డెస్క్‌ నంబర్‌ 9013151515కు ‘డిజీలాకర్‌/నమస్తే/హాయ్‌’ అని మెసేజ్‌ చేస్తే సరిపోతుంది.మీ డిజీ లాకర్‌ అకౌంట్‌లో ఉన్న డిజిటల్‌ డాక్యుమెంట్లు వాట్సాప్‌లో కనిపిస్తాయి. ఈ మేరకు కేంద్రం ఓ ప్రకటన విడుదల చేసింది. డిజీలాకర్‌ ఖాతా లేనివాళ్లు వాట్సాప్‌లోనే ఖాతాను తెరవడానికి అవకాశం కల్పించింది. ‘ఇప్పుడు వాట్సాప్‌ నుంచి పాన్‌ కార్డు, డ్రైవింగ్‌ లైసెన్సు, మార్కుల మెమోలు, ఇన్సూరెన్స్‌ పాలసీల డిజిటల్‌ డాక్యుమెంట్లు పొందవచ్చు’ అని కేంద్రం ఓ ప్రకటనలో పేర్కొన్నది. ప్రభుత్వ సేవలు సులభంగా, పారదర్శకంగా పొందేందుకు దీన్ని రూపొందించినట్టు తెలిపింది. డిజీలాకర్‌లో ఇప్పటికే 10 కోట్ల మంది రిజిస్టర్‌ అయ్యారు.